Read Q'anjob'al Sal 40 Bible Online

Sal 40 - Q'anjob'al bible

Sal 40

¹A ton bit David ti' Max wechbanejc'al colwal Jehová, axa Cham max yacbaj txiquin ayin, bay max el waw.

²Max in yiajtek Cham bay jun olan ay is may. Max in is col bay chic'a'. Max in is lecbaj oc yiban jun ch'en yet chin ec'jab yin watx'.

³Max yak' wal jun ac' bit ayin, bit yin aloj watx' k'anej bay co Diosal. Xiwil eb ok c'ay c'ul yet ok yilon eb jun ti'. Axa Jehová ok yaoc eb yipok c'ul.

⁴Tzalojc'ulal yet mac tol a Jehová chi yaoc yipok c'ul, cax c'am chi yaoc ba xol eb ec'nakwom chi yiay ba bay yechelej c'am yelapnok.

⁵Mamin Jehová, ach in Diosal, xiwilxa juntzanxa tzet c'ayubtak max onej, c'al juntzan a nabal max a nabalnej jin on. Xan c'amxa mac axca ach. Chi yochej in c'ul chi walil yabixal a watx'c'ulalil, palta puch xiwilc'al yintak juntzan chi je' waloni.

⁶C'am chochej no no' yin ofrendail, tamwal ixim trigo. Tokwal ay no no' cha k'an yet chi tz'a yin xajanbalil, tamwal ofrenda yet chi tancan el mulej. A ti' et, max ol in txiquin.

⁷A yuj tu' xan max wala': Tix in chin jay ti', quin chi, axcata' tz'ibelaycan wabixal yul tx'an un.

⁸Chi cha in c'ul wunen ochwan, ach in Diosal. Ibil oc a cuybej yin wanimail.

⁹Max walcan el yabixal a tojolal bay miman wajayil a conob. Mamin Jehová, ojtak wali, tol c'am bay chin tz'inji.

¹⁰C'am bay tol c'am chi wal a tojolal. Max wal yabixal, tol chak'c'al yun tzet chala', c'al ak'on colbanilej. C'am ton wal bay max webaj el a camc'ulal, c'al tzet chak' yun tu' satak a conob wajan ec'ok.

¹¹Axa pax ach ti' Mamin Jehová, manchak ach pax wanaj ak'on a watx'c'ulal ayin. A a camc'ulalil chin ilonc'alta' axca aloni.

¹²Yujtol xiwil tzet chin oni, c'amxa chi bischaj wuj. Lananxa in michchaj el yuj in yobc'ulalil chi wabej. C'amxa chin tzakay wiloni. Ec'banxac'al bisil in yobc'ulalil tu' yintak bisil xil in jolom. Ayinxa tok yin somc'ulal tinani'.

¹³Ocan t'anan win Mamin. Sebach, colin elok. Titan yin aymanil cax chach oc wipomalok.

¹⁴A eb chi yochej c'ul chin yak' camok, q'uixwokokab c'ul eb, cax somchajokab aj c'ul eb. Ocokab eb yin mimek q'uixwilal, cax chi toj eb elok, eb chi ochen tol yob chin elocok.

¹⁵A eb chin buchoni, canokab eb yin c'amxa is nabal yuj somc'ulal.

¹⁶Axa masanil eb chach ocheni, tzalojokab eb en. ¡Caw wal miman ach Jehová! ẍiokab eb chi ochen a colwal.

¹⁷Axa in xin, ok'bal in c'ul, cax ayin oc yin bilc'ulal, manchak in tojcan yin c'ayc'ulal oj xin Mamin. Achc'alta' chin a colo', xan chin bekchajcan elok. Ach Jehová in Diosal, manchak ach mayji in a coloni.