Read Q'anjob'al Sal 45 Bible Online

Sal 45 - Q'anjob'al bible

Sal 45

¹A ton bit eb yinatil Coré ti' Ay wal ec' watx' k'anej yin in c'ul yak'ban chi wal in poesía bay cham rey. A in ti' lajan yetok tz'ibbalej yet junok watx' tz'iblom.

²¡Asannej ach watx' eli yintak masanil winak! Chi yak' sobra k'anej watx' ayach, yujtol chi yak'c'al Dios watx'c'ulalil eban.

³C'albaj oc espada yin a nan, ach winak wal tol ak'om owal. Ay a mimanbilal, c'al ekbej.

⁴Elantek yiban a chej yetok ekbej yin ak'on ayc'ay owal, yuj watx'ilok k'anej yel, c'al a watx'nen el k'anej yin tojolal bay eb yaynakil. Mimek tzet yetal ok yun a watx' k'ab.

⁵A a julbal lupupi txam chi toj jeknaj yul c'ul eb ajc'ul oc en. Yuj tu' xan ok ayc'ay eb conoblak xol akan, ach Rey.

⁶Ach Dios, Rey ach yin tojbalk'inal. Yajaw ach, watx'c'al chi yun a beyc'ulnewi.

⁷A wal tojolal chi cha a c'ul, c'am chi cha a c'ul yobtakil. A wal yuj tu' xan max ach siq'uil Dios, a ton a Diosal; max yak' miman tzalojc'ulal ayach yintak juntzanxa eb ay yopiso etok.

⁸Chi el jab perfumeal mirra, c'al yet áloes, c'al casia yin a pichil. Son ay is tx'anil ok ak'on tzaloj a c'ul bay atut, tol marfilc'al elok.

⁹Ay eb ix cutz'in eb cham rey xol a wajyom. A bay tz'eyil a trono yet a watx' k'ab, a tu' ayic' xal reina. A ch'en oro yelxac'al watx' ayoc yin xal.

¹⁰Abxalwan, ach yistzil ach rey, chi cam aben tzet ok wal ayach. Manchakxa a na' eb ecan c'al eb et conob,

¹¹yujtol a cham rey chi ochen watx'il eli, a ton cham Ajawil. Ocan yin ikemal bay Cham.

¹²A eb aj Tiro, ok yak' eb sabalej ayach. A eb mimek beyom ok yochej eb ok oc amigook.

¹³Ti chi jay ix ix ok oc yetbiok cham rey, watx'xac'al yili ix, is cutz'in junok rey c'apaxok, oro ayoc yinlak is pichil.

¹⁴Watx'xac'al is pichil ix. Chi ilaytok ix bay cham rey. Tzakan eb ix k'opoj ix is mayok ix, a ton eb ix is yamiga ibil oc yuj.

¹⁵Yin tzalojc'ulalil chi beytok eb, chi oc eb yin tzalojc'ulalil bay yatut cham rey.

¹⁶Ach rey, a eb onenal, ok ay chotan eb bay tronoben eb echmam, cax ok ak'on yikbej eb yin yak'on cuenta masanil yul a makbej.

¹⁷Ayin ok wak' nalay a bi bay masanil anima chi jay aljok bay yulyibank'inal ti'. Axa eb conoblak, ok ach yi can eb yin aloj watx' k'anej yin tojbalk'inal.