Read Q'anjob'al Sal 46 Bible Online

Sal 46 - Q'anjob'al bible

Sal 46

¹A ton bit eb yinatil Coré ti' A Dios ayoc jenelok, a' c'apax ayoc jipomalok. A Cham chi oc jetok yet ay co cawxinakil.

²Tix wal yuj tu' xan c'am chon xiwi. Caxc'al mi chi tziclay paxay tx'otx' tx'otx' ti', cax chi paxay witzlak yul yich a' mar,

³caxc'al mi chi bil a' mar cax chi aj chulnaj sat a', caxc'al mi chi tziclay witzlak yuj yowal a', palta c'am chon xiwi.

⁴Ay jun a' miman aej chi ak'on tzaloj c'ul eb cajyom bay conob Dios, a ton is cajlobal Cham Axac'al Ocok.

⁵A Dios ayic' nan conob tu', cax chi alay oc yip yuj. Chi oc Dios yetok, yet chi sakbi.

⁶Ok el yaw mimek conoblak cax ok bilaj nacionlak. Ok uljoktok tx'otx' tx'otx' yet ok ablay yul is nuk' Dios.

⁷A Jehová Cham Yajaw yin masanil ayic' jetok. A Diosal jichmam Jacob ayoc jetok, cax a' ayoc jenelok.

⁸Ul ilek tzet yetal c'ayubtak max yun Cham bay yiban tx'otx' tx'otx' ti'.

⁹Mayal c'aychaj el owal yuj, masantac'al bay lajub yulyibank'inal. Max k'ajcantok is julbal eb yuj Cham. A ch'en lanza max coc'axtok yuj. Max yacan oc k'ak'al carruaje yet owal.

¹⁰Chi yal Dios bay nacionlak: Bekek e yak'on owal. Ojtaknejek elok tol ayin ton Dios in. Ok al-lay el in mimanbilal xol masanil nacionlak bay sat tx'otx' ti', ẍi Dios.

¹¹¡A Jehová Cham Yajaw yin Masanil ayic' jetok! ¡A Diosal jichmam Jacob ayoc jetok, a' ayoc jenelok!