Read Q'anjob'al Sal 47 Bible Online

Sal 47 - Q'anjob'al bible

Sal 47

¹A ton bit eb yinatil Coré ti' ¡Tzak'ek e k'ab e masanil ex conoblak! ¡Ex conob, awjanek bay Dios yin tzalojc'ulalil!

²Yujtol a Jehová, Cham Axac'al Ocok, caw ay is may yayji oc Cham, a ton Cham Yajawilal masanil tx'otx' tx'otx' ti'.

³Max coc'axcantok conoblak, c'al nacionlak yuj, cax max yaoncan oc eb yalan jikbej on.

⁴A Cham max sic'on el tx'otx' tx'otx' ti', bay chi tzalojbi co c'ul ayon yinatil on Jacob ti', tol camc'ulnebil on yuj Cham.

⁵A Jehová Dios mayal ajtok bay is trono xol aw yin tzalojc'ulalil, c'al xol nuk' trompeta.

⁶¡Bitnanek, bitnanek bay Dios! ¡Bitnanek, bitnanek bay Cham co Rey!

⁷¡Bitnanek yin aloj watx' k'anej bay Dios, yujtol a Cham Yajawil masanil tx'otx' tx'otx'!

⁸A Dios ayoc Yajawilal bay masanil nacionlak. Chotan ay Dios bay is trono tol asannej ay yet.

⁹Max waj ba eb anima mimek yikbej xol nacionlak, max oc eb co tz'akilok ayon is conobal on is Diosal Abraham ti'.

¹⁰A Dios ay yet eb yajaw bay yulyibank'inal ti'. A Cham chi lajoc yintak masanil.