Read Q'anjob'al Sal 50 Bible Online

Sal 50 - Q'anjob'al bible

Sal 50

¹A ton bit cham Asaf ti' A Jehová Cham Dios Axac'al Ocok max k'anjabi. Max yawtej eb cajyom bay tx'otx' tx'otx', tac'al bay yichcan, masantac'al bay yayub c'u.

²A bay tzalan Sión, conob wal tol a' ijan yili, a tu' chi tx'ox Dios is tzekekial.

³Chi jay co Diosal, palta c'am chi jay yin numanil. A bay satak Cham ay jun k'ak'ej tol c'aywajwom. A bay yinlak Cham ay jun owal cak'ek'.

⁴Ata bay can chi yawtej Dios satcan, c'al tx'otx' tx'otx', yet watx' chi yil eb yoc beyc'ulal yin is conob.

⁵Chi yal Cham: Wajek aj eb wet-xa ayin, eb max ak'on jun xajanbal ayin yuj yak'on eb trato wetok, ẍi Cham.

⁶Axa satcan chi tx'oxoni tol a Dios Juez ton yin tojolal.

⁷Chi yalon pax Cham: Ex in conob Israel, abxalwanek, watx' ok wut walonc'al tzet yetal ayex. Ayin ton Dios in, e Diosal in ti'.

⁸Maj ex wak' cuenta yuj e yofrenda tol che yak'c'alta' ayin, c'al no no' che yak' tz'a bay waltar.

⁹C'am chin k'an no ach'ej wacax xol no' jobbil e yuj. C'am no mam chiwo yul e corral chin k'an ayex.

¹⁰Tol wet masanil no' xolakteal no'. Wet c'apax no no' ay xolak witz.

¹¹Wet masanil no tz'iquin xolak te', c'al masanil tzet yetal chi bil xolak eltzab.

¹²Ta ay in wajil, maj mi wal ayex, yujtol wet jun yulyibank'inal ti' yetokc'al masanil tzet yetal ay bay.

¹³Tokwal a chibej wacax chin chi', tokwal chi wuc' chiq'uil no mam chiwo.

¹⁴A ofrenda chi wochej, a ton e aloj yuj diosalil ayin. Yunokab tzet che yaltej ayin, ayin tol Axac'al in Ocok.

¹⁵A yet ay e yailal, awtejek in. Ok ex in colo', axa ex, ok in e yiaj can, ẍi Dios.

¹⁶Axa bay eb yobtakwom chi yal Dios axca ti': ¿Tzet e yalon e yet yin e yalon el in cuybej, ma e yalon el yabixal in trato?

¹⁷Ilab tol c'am chi yal e c'ul chex wak' cuenta, cax c'am yelapnok in k'anej yul e sat.

¹⁸A yet chi jay nak elk'om, toxac'al chex aj txulnaj e toj yetok. A yetok eb ixlom watx'xac'al e yak'oni.

¹⁹A ti e yet, yelc'ulal chex nawi aj k'anej, c'am chex oc wanaj e yalon lek'tial.

²⁰A yin e yuẍtak, tol junnej e mam e txutx yetok, che yal yobal k'anej yin.

²¹Tix masanil e mul ti', c'amto tzet chi wala'. Yuj tu' xan max e na' tol lajan in e yetok; palta ok waloc e mul yin e sat, ok wil-lej oc in sat e yetok.

²²A ayex chin toj c'ayc'ulal e yuj ti', watx'okab chi yun nachaj el jun ti' e yuj, axa talaj chi yunej, ok ex wak'on coc'axok, cax c'am mactxel ok ex colon el ayin.

²³A mac chi alon yuj diosalil ayin, ay welapnok yul sat. A mactxel ikem ayin, ok in colcan elok, ẍi Dios.