Read Q'anjob'al Sal 52 Bible Online

Sal 52 - Q'anjob'al bible

Sal 52

¹A bit David ti', yet max jay cham Doeg aj Edom cax max yalon yab Saúl tol max ec' David bay yatut cham Abimelec. ¿Tzet yuj xan cha maynej a ba yin a yobtakil ach c'asan yin yobal? ¡A camc'ulal Dios ayc'al ec' yin tojbalk'inal!

²Ac'al yobtakil cha na' oneni. A a ti' axcawal cuchillo el, yin aloj k'anej man yelok.

³A yobtakil chi yochej a c'ul yintak watx'il; a k'anej man yelok chochej yintak k'anej yel.

⁴Ach anima cab sat, a wal k'anej yin etnej anima chochej.

⁵Palta xin, axca ton tu' ok yun a c'aylay el yuj Dios yin tojbalk'inal. Ok oc mitx'an en, cax ok ach yioncan el bay atut. Ok yican el a k'inal.

⁶A eb ikem bay Dios ok yil eb jun ti', cax ok xiw eb bay Cham, palta ok buchwaj eb yin jun winak tu'.

⁷Ok yal eb: Ilek wal nak manak Dios chi yaoc yipok c'ul, asan is miman beyomal max yaoc yipok c'ul, cax ayc'al oc nabal yin is yobtakwomalil, ẍi eb.

⁸Ayin ti', axca te olivo in, te' tol yax ch'ib bay templo Dios. Asan camc'ulal Cham ok wac'al oc yipok in c'ul.

⁹Ach in Diosal, toc'alta' ok wal yuj diosalil yuj a watx'c'ulal ayin, chach wac'al oc yipok in c'ul, yujtol watx' ach, satak eb et-xa ok wal abixal tol watx' achc'alta'a.