Read Q'anjob'al Sal 55 Bible Online

Sal 55 - Q'anjob'al bible

Sal 55

¹Ach in Diosal, ab in txaj xin, manchak entaknej el in tewilal.

²Ocan t'anan win, paktzej in in k'ana'. Yin wal in yailal chi walon in ba ayach.

³Chin bilaj yuj eb yobtakwom ajc'ul oc win. Chi el yaw eb yuj is yajc'ulal. Miman in yailal max yatek eb wiban. Yetok wal yowal c'ul eb chin yukten ec' eb.

⁴Chi yab yail wanimail yuj eb. Mayal jay is may camich wiban.

⁵Max jay jun miman xiwc'ulal win. Ipan in bilaj yuj xiwc'ulalil.

⁶Chin naoni: Matawal ay in xic' axca yet no uch, chin mi toj jupupok, cax mi chin ayji yin junc'ulal.

⁷Chin mi tojcan jupupok najat. A mi bay tz'inan tx'otx' chin cajay ec'ok.

⁸Am wal tu' chin toj in col in ba yuj yowal, tol axca cakxuchum cak'ek' nab tu', quin chi.

⁹Mamin, c'aycan el eb yobtakwom, etnejtok is k'anej eb. Asan owal, c'al yaxc'ayinakil chi wil yul conob.

¹⁰Tol chi ec' oyoyok eb yinlak conob yet c'ualil, c'al yet ak'balil. Ay wal yobtakil xol conob, c'al naoj aj k'anej. Max etax el conob yuj eb.

¹¹Ay yaxc'ayinakc'ulal yulak calle, c'al etnewal.

¹²Ta comon ajc'ul chin etneni, chi mi techaj wuj axca tu'. Ta a mac chi chichon oc c'ul win chin uten axca tu', chi mi webaj el in ba bay.

¹³Akxa tinani', ach wal caytu' chin otej, ach tol wuc'leb ach, in watx'il anima ach.

¹⁴Junej on, max on toj bay templo Dios, max michchaj k'anej juj yin amigoal, junej on max on toj xol anima.

¹⁵Jayokab moc'naj camich yin eb ajc'ul oc win. Iquisokab eb, chi ayc'ay eb yul yolanil camnak. Yujtol ay wal ec' yobc'ulalil eb yin yanimail, c'al yul yatut eb.

¹⁶Axa bay Jehová Dios ok wal in ba ayin ti'. A Cham ok in colon elok.

¹⁷Ok wal in ba yin ok'ilal yet k'inibalil, c'al yet yayc'ualil, c'al yet ak'balil, axa Cham ok yab yoc yul in nuk'.

¹⁸A Cham ok in colon el xol owal. Man ok in chalay cam yuj Cham, caxc'al xiwil eb ajc'ul oc win.

¹⁹A Dios, Yajaw Cham yin tojbalk'inal. A' ok in abenok, cax ok low yin eb. Tokwal chi q'uex eb is beybal, tamwal chi xiw eb bay Dios.

²⁰A wuc'leb tu' chi tx'ox is k'ab bay eb is watx'il anima, tokwal chi yikej yalben yin amigoal.

²¹C'ununixac'al yoc k'anej axca c'unal mantequilla, palta owal chi yochej. Chi yak'balnej k'anej tol c'ununixac'al, ti tol axca wal espada puch el, axca tu' yelapnok is k'anej tu'.

²²Masanil tzet cha na', acantok bay Jehová, axa Cham ok ak'on a tec'anil. A mac ikem bay, c'am bak'in ok cha' ayc'ayok.

²³Ach in Diosal, a eb mak'om cam anima yetok eb naom aj k'anej, c'am is cawil eb, maj yil eb nanok is k'inal. Ach ton ok atok eb bay yolanil camnak. Axa in xin, yip ach in c'ul.