Read Q'anjob'al Sal 56 Bible Online

Sal 56 - Q'anjob'al bible

Sal 56

¹A bit David ti' yet max mitx'lay yuj eb filisteo bay Gat. Ach in Diosal, ok' wal a c'ul win, ay eb anima chin ukten ec'ok. Ayc'al oc eb yak'on owal win, cax chin is witz'ban eb.

²C'amc'al chi bek eb in yukten ec' eb wajc'ul, tol xiwil eb. Yin maynejbail chi yak' eb owal win.

³A yet chin xiwi, ach chach waoc yipok in c'ul.

⁴Ach Dios, chach waoc yipok in c'ul, cax chi walon watx' k'anej yin alben. Ach chach waoc yipok in c'ul, cax c'am chin xiwi. ¿Tzet wal ok in yut anima?

⁵C'amc'al chi bek eb yalon ya' k'anej win. Asanc'al tzet chi yun wetax el chi na eb.

⁶Tzanc'al baytal chi c'ubaj el ba eb yuj in maklayi. Chi yechbanej eb janic' chin yak' cam eb.

⁷¿Tom okto wal el eb yin is mul ti'? Ach in Diosal, ak' ayc'ay eb conoblak tu' yuj yowal a c'ul.

⁸Ach inen oc bisil jayelxa chin elic'ok. Ojtak jantak yal in sat max eli. Tokwal man tz'ibok yayji bay a libro.

⁹A eb wajc'ul ok el eb yet ok in k'anon a colwal. Ayin ti' wojtak wali tol ayach oc wetok.

¹⁰Ach Jehová Dios, chach waoc yipok in c'ul, cax chi walon watx' k'anej yin alben.

¹¹Ach Dios chach waoc yipok in c'ul, cax c'am chin xiwi. ¿Tzet wal ok in yut anima?

¹²Ach in Diosal, ok wikej in ti' max wak' ayach, yin walon yuj diosalil ayach.

¹³Yujtol max in a col bay camich, max in a col yin tol maj in ayc'ayok. Yuj tu' xan chin ec'jab a satak bay sakk'inal chi tzektanen eb iquis.