Read Q'anjob'al Sal 58 Bible Online

Sal 58 - Q'anjob'al bible

Sal 58

¹A ton bit David ti' A wal ayex juez ex ti', ¿yin mi wal tojolal che yutej? ¿Yel mi wali, yin mi mojalil che yak'on lowbanilej?

²Akxa tinani', che watx'nej yin e tx'ok nabalil. Ikbajwom ex yin yaxc'aynakil yul conobal ti'.

³A eb unem yobtakil, yettaxc'al chi alji eb yin is txutx cax chi yaon oc ba eb yin c'aynakilal. A eb naom aj k'anej, yintakc'al yaljubal eb, chi oc eb yin lek'tial.

⁴Lajan eb yetok labaj ay venenoal. Lajan eb yetok no txutx labaj tol chacan.

⁵C'am chi yab no' is sonal mago, eb tol jelan yin mansonen no'.

⁶Ach in Diosal, mak' poj ye eb. Mamin Jehová, mak' poj ye juntzan axca coj tu'.

⁷C'ayokab aj eb axca chi yun c'ayaj a' aej chi pultok. A yet chi julwaj eb, c'amokab txam te julbalej tu'.

⁸Uljiokab tok eb axca no c'otoc'. Axcaokab eq'uel unin, majc'al yil sakk'inal, cayokab tu' chi yuncantok eb.

⁹Axca te takin q'uix chi wajlay oc payok xij, tol chi tan k'ak'al yet manto ukok xij tu', cayokab tu' chi yun yilay el eb yobtakwom yuj Dios yet iquisto eb.

¹⁰A mactxel ikem bay Dios ok ton tzaloj aj c'ul eb yet chi ec' pak bay eb yobtakwom. Ok bontok yakan xol chiq'uil eb yobtakwom.

¹¹Cata wal tu' ok al-layok: ¡Watx' jet, ta ikem on! Ay ton wal jun Dios chi beyc'ulnen eb cajyom bay yulyibank'inal ti'.