Read Q'anjob'al Sal 59 Bible Online

Sal 59 - Q'anjob'al bible

Sal 59

¹A ton bit David ti' yet max yaontok Saúl is soldado bay yatut, yuj yak'lay cam David tu' yaloni. Ach in Diosal, colin el bay eb ajc'ul oc win. Colin el bay eb chi tit win yuj yajc'ulal.

²Colin el yul k'ab eb unem yobtakil. Colin el bay eb mak'om cam anima.

³Mamin Jehová, ay anima miman yikbej, chin maklay yuj eb, yuj in is mak'on cam eb, palta man yujok in yobtakil, ma yuj chin ec' yiban.

⁴Mamin, c'am chin ec' yiban, c'am in mul bay eb. C'am tzet yetal yob max wunej. Palta xin, nanon yec' c'ul eb yak'on eb yobc'ulal win. Mamin, ilintek, titan, quin ul a coloni.

⁵Axa ach Mamin Jehová, Yajaw ach yin masanil, co Diosal ach ayon Israel on ti'. Ajan wanok, cax chaon oc yailal eb conoblak. Manchak cus a c'ul yin eb yobtakwom chi meltzoj oc win.

⁶Chi jay eb yet chi k'ekbi, chi el yaw eb axca no tx'i', cax chi ec' oyoyok eb yinlak conob.

⁷Chi el sukuwal ti' eb, chi ec' eb. Chi yalon eb k'anej ya'. C'am mac chon abeni, ẍi mi wal eb.

⁸Axa ach Mamin Jehová, chach ton tzewi yuj eb. Chach ton buchwaj yin eb conoblak.

⁹Ach in Diosal, a en ipanc'al in colon in ba, yujtol ach ayach oc wipomalok, c'al enelejal.

¹⁰A Cham Dios chin camc'ulneni, a' ok jay in ul coloni. Ok yak' wil yayc'ay eb ajc'ul oc win.

¹¹C'am cha mak'cam eb, yet watx' manchak toj c'ayc'ulal is yailal eb yuj in conob. Chak'on ayc'ay eb, cax cha saklemnej cantok eb, ach Jehová co Colomal ach.

¹²A yin masanil is k'anej eb, chi oc mul eb. Ayc'ayokab eb yuj is luesal, c'al yuj is lek'tial, c'al aloj el catab k'anej.

¹³C'aycan el eb yin ak'balnen yowal a c'ul. ¿Tzetto wal yuj xan iquis eb? Elokab a k'umal, masantac'al bay lajub yulyibank'inal, ach Dios, tol Yajaw ach co xol ayon yinatil Jacob on ti'.

¹⁴A yet ak'balil chi jay eb cax chi el yaw eb axca tx'i', cax chi ec' oyoyok eb yinlak conob sayon is lobej, chi awji eb axca yokli no tx'i', yuj c'am chi yab c'ul eb is lobej.

¹⁶A pax ayin bian, ok ach in bitnej yet wal k'inibalil. Ok walcan el yin bitalil a camc'ulal, c'al yuj chi je' oj masanil. Ilab xin tol ach ayachc'al oc wenelok. In colbalba ach yul tiempoal yailal.

¹⁷Ach in Diosal, ok wal watx' k'anej ayach yin bital. Ilab xin, in colbalba ach toni. Ach in Dios, chin a camc'ulnej.