Read Q'anjob'al Sal 60 Bible Online

Sal 60 - Q'anjob'al bible

Sal 60

¹A jun bit ti' yet cham David, yet cuybanil yet max oc owal yetok eb sirio aj Naharaim, c'al eb aj Soba, cax max toj Joab max yak'on cam 12,000 eb aj Edom bay jobeal atz'am. Ach co Diosal, yin wal yowal a c'ul max on a bekcanok. Max on a bek ayc'ayok. A tinani' xin Mamin, ak' meltzoj jip junelxa.

²Max ton ak' bil jun tx'otx' ti' cax max jatcantok tx'otx'. A tinani' xin, makchej is jatilal tx'otx' tu', yujtol chi coc'axcantok.

³Mimek yailal bay max ec'can el a conob oj xin; axca tol max ak' vino ayon tol max con oybi yuj.

⁴Max ak' junok yechelej bay eb ay elapnok yul sat, yet watx' c'am chi ayc'ay eb yet ay beyc'ulal.

⁵Tak'wej on, colon elok, yujtol chi je' oj masanil. Colcan el eb cha camc'ulnej.

⁶A Dios atac'al bay is templo max yala': Ok tzaloj aj in c'ul yet ok in coc'pojnentok Siquem, c'al yac'alil Sucot.

⁷Axa Galaad c'al Manasés, in satak yayji ocok. Axa Efraín, axca cascoal in jolom; axa Judá, axca varail wikbej.

⁸Axa Moab axca palangana yet in tx'aj k'ab. Axa yiban Edom ok wacantok in xanab. Yin tzalojc'ulalil ok in awjok yuj max ayc'ay eb filisteo wuj, ẍi Cham.

⁹¿Mac chin iontok bay conoblak ayoc murallail yinlak? ¿Mac chin iontok bay Edom?

¹⁰Ilab xin tol max con entaknej el ach Dios. Tok chito je' a c'ul chach toj yetok eb co soldado on.

¹¹Ocan jetok xin, colon el bay eb ajc'ul, tokwal ay yelapnok colwal eb anima ayon.

¹²A yuj colwal Dios, xan miman tzet yetal ok junej. A Dios ok tec'oncan ay eb ajc'ul oc jin.