Read Q'anjob'al Sal 62 Bible Online

Sal 62 - Q'anjob'al bible

Sal 62

¹A ton bit David ti' Asan ton yin Dios chi chaloj in junc'ulal. A bay Cham chi tit in colbanil.

²Asan Cham chin colon elok, cax chi oc Cham wenelok, tokwal ok in telc'ojok yujtol a Cham ayoc in colbalbaok.

³¿Bak'in ok e bek e yoc bulnaj win, cax ok in e k'okoncan aytok yayti' e yaloni? Axcaxac'al tol toxa chin ec' bulnaj axca icham na, ma axca icham corral toxa chi ec' bulnajok.

⁴Asan tzet chi yun yetax el in mimanbilal che naobtanej. E k'inalxac'al yin e naoj aj k'anej. Che tz'ak e yal e watx' k'anej ayin, palta axa yin e nabal chin e catabnej.

⁵Asan yin Dios chi chaloj junc'ulal wuj. Asan Cham ayoc yipok in c'ul.

⁶Asan Cham chin colon elok, cax chi oc wenelok. Tokwal ok in ayc'ayok. A Cham ayoc in colbalbaok.

⁷A bay Dios chi tit in colbanil xan ay welapnok. A Cham ayoc wenelok c'al in colbalbaok.

⁸Ex wet conob, asannej Cham che yaoc yipok e c'ul, k'anjabanek yin txaj bay Cham yin masanil e c'ul, yujtol a Dios co colbalbail yayji.

⁹C'am chi je' jaon oc eb jet animail yipok co c'ul, caxc'al meba' eb, caxc'al beyom eb. Lajan eb axca junok tzet yetal c'am yalil chi ay yul echbal. Caxc'al junxanej chi yun eb ca makanil, tutun c'am jabok yelapnok eb.

¹⁰Manchak e yaoc yaxc'aynakil yipok e c'ul. Man e yaoc yin e c'ul elk'an. Ta k'okbil chex oc beyomal, man e yaoc e beyomal tu' yipok e c'ul.

¹¹Tx'ial el max wab yalon Dios, tol chi je' yuj masanil, cax ayc'al is camc'ulal. A Cham chi paktzen bay junjun, atac'ala' tzet max el yuneni.