Read Q'anjob'al Sal 63 Bible Online

Sal 63 - Q'anjob'al bible

Sal 63

¹A bit David ti' yet ayic' bay tz'inan tx'otx' yul yet Judá. ¡Ach in Diosal, toc'alta' in Diosal ach! Chach wochej yin masanil in c'ul, chach yochej wanimail axca chi yun yochen takin tx'otx' nab.

²Chi yochej in c'ul chi wil en bay a templo, cax ok camil in c'ul wilon wal epalil c'al a mimanbilal.

³¡A wal a camc'ulal, yelc'al tol ay yelapnok yintak wiquisal! Yuj tu xin, ok ach in bitnej.

⁴Masanil tiempo yet iquis in, ok wal in watx' k'anej ayach, cax yin txajil ok in mojban aj in k'ab ayach.

⁵Watx'xac'al ok yuncan el in c'ul yuj, axca mactxel chi yak' nabal yin loj watx'; yin tzalojc'ulalil ok ach in bitnej.

⁶A yet ak'balil, yet telan inxa ajok, chach in naontek, cax chi ec'c'al in nabal en.

⁷Ach ton wal ay a colwal ayin. Tol chi el lenaj chi wila', axcaxac'al tol ayach oc wenelok.

⁸Max in k'ay en sic'libil. C'am chin beklay el yuj a watx' k'ab.

⁹A eb chi yochej c'ul chin yak' camok, ok tokcan xuynaj eb yul yolanil eb camnak.

¹⁰Ok ak'lay cam eb yuj ch'en espada, axa no ok ok chion aytok eb.

¹¹A pax in, ayin rey in ti xin, ok wak' tzalojbok in c'ul yin Dios. Ok bitnok masanil eb chi yak' binaj Dios yin tzet bay chi yak' is ti', axa wal eb lek'ti' xin, c'amxa tzet ok yal eb.