Read Q'anjob'al Sal 66 Bible Online

Sal 66 - Q'anjob'al bible

Sal 66

¹Yin tzalojc'ulalil chex bitni bay Dios, masanil ex cajyom yulyibank'inal ti'.

²Bitnejek is mimanbilal Cham. Bitnejek wal bit tol watx' bay.

³Alek bay Dios: Yelc'al tol c'ayubtakxac'al onben. A wal a satak chi ayc'ay eb ajc'ul oc en yuj a miman ipejal.

⁴A masanil eb anima yulyibank'inal ti' chi yiay ba eb ayach, cax chach bitnen eb, quex chi.

⁵Titanek, ilek wal yunben Dios. C'ayubtakxac'al tzet max yun Cham yin anima.

⁶Takin tx'otx'xa max yuncantok jun mar tu' yuj. A bay a' miman aej max ec' eb jichmam yin takinal. Tzalojokab co c'ul yin Dios.

⁷A yetok is yipalil Cham chi yak' yajawil yin tojbalk'inal. Ayc'al oc sat yin nacionlak, yet watx' a eb chi ec' yiban, man ok aj wan eb yin.

⁸¡Ex nacionlak, alek e watx' k'anej bay co Diosal! ¡Ablayokab e bit yin watx' k'anej bay Cham!

⁹Ilabi ay co cawil yuj Cham, c'am chon bek ayc'ayok.

¹⁰Ach Dios, ti' wal max el co nabal on. Axca sakbanelay plata, axca tu' max yun on a sakbaneni.

¹¹Max on ak' ayc'ay yul yal, yelc'al tol al ikatz max ak' jik on.

¹²A wal comon anima max ak'balnej on is tec'oni. Max on eq'uel xol k'ak'ej, c'al xol mimek aej oj. Lajwi tu' max on eontok bay colan.

¹³Ok in oc yul a templo, cax ok wak'on in xajanbal ayach. Catawal tu' ok wak'on yun walben ayach,

¹⁴a ton walben yet wal ayin oc yin bilc'ulal.

¹⁵A no no' bak'ech ok wak' tz'a bay altar. Ok wak' no wacax, c'al no mam chiwo, c'al no icham calnel yin xajanbal ayach tol chabejtak oj.

¹⁶Sebaxek e masanil, mac ex ay yelapnok Dios yul e sat. Abxalwanek ayin xin, ok wal e yabix yuj is watx'c'ulalil Cham ayin.

¹⁷Max wawtej Cham, cax max walon watx' k'anej bay.

¹⁸Ta maj in na in ba yin in mul, maj mi yal c'ul Cham Yajaw max in is yabej.

¹⁹Palta max ton in yab Cham xin, cax max yikej in txaj.

²⁰¡Al-layokab watx' k'anej bay Dios, yujtol maj yintaknej el in txaj, maj wal basnej Cham is camc'ulal ayin!