Read Q'anjob'al Sal 68 Bible Online

Sal 68 - Q'anjob'al bible

Sal 68

¹A ton bit David ti' A wal yet chi aj wan Dios yin ak'oj owal, sakleminakxac'al chi yun yel eb ajc'ul oc yin Cham. A eb chi chichon oc c'ul yin Cham, chi elaj eb satak.

²Axca wal c'ayaj mub xol cak'ek', cay wal tu' chi yun c'ayaj eb, axca wal yuljitok ixcab xol k'ak'ej, cay wal tu' chi yun c'aycan el eb unem yobal satak Dios.

³Axa wal eb watx' xin, chi tzaloj aj c'ul eb satak Cham. Chi aj t'uknaj eb yin tzalojc'ulalil.

⁴Ayex ti' xin, bitnanek bay Dios, bitnejek xiwil bit bay Cham. Alek watx' k'anej bay Cham tol chi ec' yiban asun, a ton Cham chi yik Jehová. ¡Tzalojanek yin Jehová, tzalojanek satak Cham!

⁵A Dios, Cham cajan ec' bay is na yet ayilal, a ton ayoc is mamok eb c'amxa is mam, is Colomal c'apax eb ix ix camnakxa yichamil.

⁶A eb chi ec' tx'oklil, chi yak' Dios bay chi cajay eb. Chi bekchaj el eb aj preso yuj, cax chi ilay aj can eb. Axa eb chi ec' yiban, a bay takin tx'otx' ok cajay eb.

⁷Ach Dios, a wal yet max ach eltek satak a conob, cax max oc beyil bay tz'inan tx'otx',

⁸max bilaj tx'otx' tx'otx', max tit yaxnab satcan, max bilaj tzalan Sinaí a satak, ach Diosal Israel.

⁹Ach Dios, xiwilxa wal nab max atek, yet watx' chi oc pax yaxilal tx'otx' a takin tx'otx' junelxa.

¹⁰A ton bay tu' max ayji ec' a conob ach Dios; yuj watx'il a c'ul xan max ak' lobej eb meba'.

¹¹A Cham Yajaw max alon jun k'anej. Xiwil eb xal alom abix max alon elok:

¹²¡Ipanxa yelaj eb cham rey yetok is soldado! ẍi eb xal. A bay nalak max pojic' eb xal ix tzet yetal max bet tok'lay ec' bay eb ajc'ul,

¹³a ton juntzan yechel paloma bonbil is xic' yuj plata c'al yuj oro. ¿Tzet yuj xan max ex cancan jaywan ex ti' xol no calnel,

¹⁴yet max elcan aj eb cham rey yuj Cham chic'al je' yuj masanil, yet lanan yay sakbacom yiban witzal Salmón?

¹⁵¡Manxa wal canilok tel witzal yet Basán! ¡Xiwilxa is witzlakil bay jolomtak!

¹⁶Mac ex cajan ex bay jolomlak witz tu', ¿tzet yuj xan che yiltek yin sawenc'ulal jun witz yet Jehová Dios, tol sic'bil el yuj, yet chi oc yetok? A bay tu' ok cajay Cham yin tojbalk'inal.

¹⁷A Dios, yinxa millonal ay bisil is carruaje yet owal. A bay Sinaí max tit yul is carruajelak, cax max jay bay is templo.

¹⁸Ach Dios, cantac'al max ach ajtok, max eontok eb preso yayji. Max a chaon sabalej bay eb anima. Ajun c'apax eb tenomtak max yak' yet. Ach Jehová co Diosal, max ach ajtok cajan bay tu'.

¹⁹Al-layokab watx' k'anej bay Cham Yajaw, a ton co Diosal, c'al co Colomal, tol junjunc'al c'u a Cham chon iloni.

²⁰A co Diosal, Colwajwom toni. A Cham Jehová Jajawil chi je' c'apax yuj on colon el bay camich.

²¹A Dios ok aon ay nan jolom eb ajc'ul oc yin, a ton jolom eb cac'al ti' naon yunen yobtakil.

²²A Cham Yajaw chi aloni: A bay Basán ok ex wak' meltzojtek. A bay a' mar najat yich ok ex wak' titok.

²³Yet watx' ok e bon e yakan yuj chiq'uil eb ajc'ul oc e yin, cax ok lek'on aj no e tx'i' yet, ẍi.

²⁴Ach Dios, in Diosal ach, in Reyalil ach; txequelc'al toj bululok anima bay a templo. Ipan toj bululok eb yuj ach yion can eb yin is k'in.

²⁵Babel eb chi bitni, axa eb aj son, tzakan eb. Axa bay is nan eb, a tu' ayoc eb ix k'opoj chi aon oc pandereta.

²⁶¡Alek watx' k'anej bay Dios Cham Yajaw! ¡Alek watx' k'anej bay Cham, ex Israel tol wajan ex ec'ok!

²⁷A yinatil Benjamín, nak tzunan unin, babel satak xiwil eb yajaw yet Judá, ajun yetok c'apax eb yajaw yet Zabulón c'al yet Neftalí.

²⁸Ach co Diosal, axca max yun a tx'oxon el epalil yet yalantok, caytu' chot a tx'oxon el ayon tinani',

²⁹yuj watx'ilok a templo bay Jerusalén, bay chi yitek eb cham rey sabalej ayach.

³⁰Tenchanej eb aj Egipto, tol axca owal no' ay xolak te aj. Tenchanej jun bulan wacax ow yetokc'al no yune', a ton juntzan nacionlak, tol yujc'al xiwil yochwan yin beyomalil chi tec'lejtok ba yin owal. Uktej saklem eb nacionlak chi yochej chi yak' owal.

³¹Ok tit eb ak'om tojlabal bay Egipto. Ok mojbaj aj eb aj Etiopía k'ab bay Dios.

³²¡Bitnanek bay Dios, ex yajaw conobal tx'otx' tx'otx'! Ak'ek jayebok e bit bay Cham Yajaw,

³³Cham chi ec'jab yibantok satcan, a ton satcan tol ayc'al yin tojbalk'inal. Abek canil yul is nuk'. Abek tol xiwilxa yipalil yawji.

³⁴Chi cam e yalon el is yipalil Dios. A is miman ikbej ayay jiban. A is yipalil Cham ay ajtok yiban satcan.

³⁵A yet chi eltek Dios yul templo, chi c'ayxac'al aj co c'ul yuj. Chi yak' Dios yipalil ayon Israel is conob on Cham ti'. ¡Al-layokab watx' k'anej bay Dios!