Read Q'anjob'al Sal 69 Bible Online

Sal 69 - Q'anjob'al bible

Sal 69

¹A ton bit David ti' Ach in Diosal, colin elok, yujtol ipan in paxay yich a'.

²Ipan in paxay yich jun chic'a' najat yich chi wabej, c'amxa bay chi apni oc tec'an wakan. Axca tol mayal in ayapnok bay najatil yich a', cax ipanxa in yikon bey a'.

³Mayal pojtok yul in nuk' wawji. Ya' yul in nuk'. Mayal c'unbi el in bak' sat yuj in makon jay in Diosal.

⁴Caxc'al c'am in mul, palta xiwil bisil eb c'am chin ocheni, yintak bisil xil in jolom. Mayal wal aj can bisil eb c'am chin ocheni, eb chi yochej chin yak' camok. Chi yochej eb chi wak' meltzoj tzet yetal tol man welk'anok.

⁵Ach in Diosal, ojtak wal in pitalil, c'am chi je' weban el juntzan in mul ayach.

⁶Mamin Jehová, Yajaw ach yin Masanil, a eb chach aon oc yipok c'ul, manokab q'uixwok aj eb yuj in mul. Ach co Diosal ayon Israel on ti', manchak taccan aj c'ul eb yuj in yobtakil, eb chi yay ba ayach yin masanil c'ul.

⁷Oj wali, xan max techaj ec' wuj jixk'anej. C'amxa chi yal in c'ul chin tx'ox in sat yuj q'uixwilal.

⁸Axca wal tol man ojtakbilok in yuj eb wuẍtak, ti' pax junnej in txutx yetok eb.

⁹Puch pitz'an oc in c'ul in ya'ilnen a templo, a yet chi buchwaj eb en, ayin jun chi wab c'apax yail.

¹⁰A yet chin ok'i, cax chi wak'on c'ajbanc'ulal, a yet tu' chin is buch eb.

¹¹Ta el pichilej chi waocok, chi aj bulnaj eb in is tzeyeni.

¹²Chin oc is yabixok eb chi ay chotan bay puertail conob, axa eb uq'uem an chin ak'on binaj yin is bit.

¹³Axa pax in, Mamin Jehová, chi aj waw ayach. ¡Ach in Diosal, ocan wetok tinani! ¡Yuj a miman camc'ulal, tak'wan ayin xin! Yujtol cac'al ti' a colwaji, xan ocan wetok.

¹⁴Colin el yul k'ab eb c'am chin ocheni. Manchak in a bektok axca xol tz'otz'ew, ma axcac'al bay a' aej najat yich.

¹⁵Manchak in a cha' yitok a'. Manchak in a cha' paxay bay yul najabil yich a', cax chin c'aycan aj bay tu'.

¹⁶Mamin Jehová, tak'wej in. Watx' ach ach ti', ayc'al a camc'ulal yin masanil. Ocan t'anan win yuj a miman yabenc'ulal.

¹⁷Manchak in entaknej el ayin a chekbej in ti'. Tak'wan ayin yin aymanil, tol ay is may bay ayin ec'ok.

¹⁸Colin elok, sebach in c'atan, colin el bay eb ajc'ul oc win.

¹⁹Ti' wal ojtak eb alom ya' k'anej win, max in etax el yuj eb, q'uixawc'ulal wayji, manxa animaok in yul sat eb. Ojtak wali mactxel eb ajc'ul oc win.

²⁰A tacnakc'ulal max etnentok wanimail, cax manxa animaok ay in c'ul, c'amxa wip. Nabac'al max in say mactxel chi ak'on mimanil in c'ul, c'al mac chi ok' is c'ul win.

²¹Max yaytok eb veneno xol in lobej, axa yet max tak in ti', max yak'on eb vinagre wuq'uej.

²²Ocokab is mimek loj eb yin yalil bay eb. Ayokab c'ay eb yin is k'in tu'.

²³Utcantok eb yin c'amxa chi ilwi eb, cax bilokab aj xub eb yin tojbalk'inal.

²⁴Ican el yowal a c'ul yiban eb. Michchajokab el eb yuj a k'ak'alc'ulal.

²⁵Canokab is cajlobal eb yin tz'inanil. C'amokab mac chi cajay bay.

²⁶Tol ajc'ul oc eb yin mac max ak' cusok, cax chi buchwaj eb yin yailal mac max ak' yasjok.

²⁷Paktzej eb yin yobal yuj yobal max yun eb. C'amxaokab yalon yet eb yin colbanilej chak'a'.

²⁸Ican el bi eb yul tx'an libro yet k'inalej. Manchak acan ay bi eb yul libroal yet eb tojol yul a sat.

²⁹A pax ayin ti' xin, tol ya' in ay, cax ayin oc yin cusc'ulal. I in aj wan, colin el ach in Diosal.

³⁰Ach Dios, ok ach in bitnej yin watx' k'anej, ok ach in bitnej yin aloj yuj diosalil.

³¹Cax watx'xac'al ok yuncan el a c'ul Mamin Jehová, yintak tatol chi wak' junok no ec'om wacax yin xajanbalil ayach.

³²A yet ok il-lay jun ti', ok tzaloj aj c'ul eb ayoc yin cusc'ulal. Axa yaj can tzaloj aj c'ul eb chi yak' ayilal bay Dios.

³³Chi yab Jehová tzet chi yal eb meba', c'am chi yintaknej el eb yet ayoc eb preso.

³⁴Bitnokokab bay Dios masanil tzet yetal iquis bay satcan c'al sat tx'otx', yetokc'al a' mar.

³⁵A Dios ok colon el conob Sión, cax ok ca watx'nen aj conoblak yet Judá. A yuninal eb is chekbej, ok cajay bay juntzan conob tu'. A tu' ok cajay eb, cax ok oc eb aj conobal. A eb chi camc'ulnen Cham ok cajay bay.