Read Q'anjob'al Sal 7 Bible Online

Sal 7 - Q'anjob'al bible

Sal 7

¹A yuj tzet max yal cham Cus, yinatil Benjamín yin cham rey David, xan max bitnej cham David jun bit ti' bay Jehová. Mamin Jehová, ach in Diosal, a yul a k'ab lanan in sayon in colbanil. Colincan el yul k'ab eb chin ukten ec'ok. Colin elok,

²a talaj chin coc'axcantok axca wal chi yut no coj is chibej, cax c'am mactxel chin coloncan elok.

³Ach in Diosal, tokwal max wun tzet max yal nak ti'. Tok ay in mul yin jun ti'.

⁴Tokwal ay bay yob max wut in c'ul yin eb watx' chi yut c'ul win. Tokwal ay bay max wetnej nak ajc'ul oc win, yin tol c'am is mul.

⁵Tatol max wetnej nak, yak'okab nabal in yukten ec'ok. Watx' ta chin michchaj yuj, cax mi chin tec'lay yuj. Lajwokokab ay in mimanbilal yuj nak.

⁶Mamin Jehová, ajan wan yin yowal a c'ul. Elantek satak yowal c'ul eb ajc'ul oc win. Ilab ach max a nabalnej el jun beyc'ulal. Ocan wetok Mamin.

⁷Ocokab oyan nacionlak en, atac'al bay a despacho bay satcan cha beyc'ulnej eb.

⁸Mamin Jehová, ach ton ok a beyc'ulnej nacionlak. Beyc'ulnej in atac'ala' in watx' beybal, atac'ala' in tojolal.

⁹Ach Dios tojol, cha say el nabalej c'al tzet yetal chi ec' yul c'ulej. Yetzanxa, c'ayokab el eb yobtakwom yetok is yobtakil, cax chak'on is tec'anil eb watx' beybal.

¹⁰A Cham Axac'al Ocok, in colbalba yayji, tol chi col-lay eb watx' nabal yuj.

¹¹A Dios, Juez tojol toni, yuj tu' xan ow Cham yin eb yobtakwom junjun c'u.

¹²Ta c'am chi na ba c'ul eb, ok nik Cham yespada. Watx'xa yayji is julbal.

¹³Lananxa watx'ji k'ak'al is julbal; watx'xa yayji mitx'k'abej tol chi oc camich yuj.

¹⁴Ilek wal tzet chi yun naon eb yobtakwom, chi na eb yobal yin eb anima, c'al etnej anima chi yunej.

¹⁵Miman yich jun yolan eb max watx'nej, cax a yul is yolan eb tu' ok tokcan eb.

¹⁶A is yobtakwomalil eb, c'al is yaxc'aynakil eb ok titcan yiban.

¹⁷Ok wal yuj diosalil bay Cham Jehová yuj is tojolal. A bay Cham Axac'al Ocok ok wak' in bit.