Read Q'anjob'al Sal 71 Bible Online

Sal 71 - Q'anjob'al bible

Sal 71

¹Mamin, a en chin col in ba, c'am bak'in chi el in q'uixwil oj.

²Colin elok, colin el yul k'ab eb wajc'ul, yujtol tojol ach. Ab wal tzet chi wala', cax chin a colon elok.

³Ocan in nach'enok yin wenelok. Ocan in corral ch'enok yet colbalba. ¡Ach axca in nach'en ayji, axca in cuartel ayji!

⁴Ach in Diosal, colin el yul k'ab eb yobtakwom, c'al yul k'ab eb mak'om cam anima c'al eb yaxc'ayinak.

⁵Mamin Jehová Wajawil, toc'alta' yip ach in c'ul yintax wach'ejal.

⁶Yettaxc'al max in alji yin in txutx, a en chi wi wip. Ach max quin ak' aljok. Ok ach wak'c'al bitnajok.

⁷Xiwil mac max jay nabal yuj max yil eb tzet wayji, yujtol ach chin a colc'altek.

⁸Masanil c'ual, cac'al ti' walon watx' k'anej yin a mimanbilal.

⁹Manchak in entaknej el yet icham inxa. Manchak in a bekcan yet c'amxa wip.

¹⁰A eb ajc'ul oc win, eb chi yochej c'ul chin yak' camok, chi waj eb yetbi, cax chi lajtinen ba eb win.

¹¹Chi yalon eb: ¡Uktejek, mitx'ek! ¡Tokwal ayto oc Dios yetok, tokwal ayto mactxel ok colon el tinani'! ẍi eb.

¹²Ach in Diosal, manchak ach el najat in c'atan. Titan yin ayman, cax ocan wetok.

¹³A eb chi oc ajc'ulal win, camokab eb yin q'uixwilal. Canokab eb yin c'am yelapnok, eb chi ochen chin etaxi.

¹⁴Axa in xin, yip achc'alta' in c'ul yin junjun txolan. Ok in ajc'al can ach in bitneni.

¹⁵Masanil c'ual, ok walil yabixal a tojolal, c'al a colwal, caxc'al mi c'am chi nachaj el wuj masanil.

¹⁶Mamin Jehová Jajawil, a juntzan mimek tzet yetal max onej, a' ok in bitnej. Ok walil abixal tol asannej ach ay a tojolal.

¹⁷Ach in Diosal, yintax uninal max in a cuyoni. Ipantoc'al walon el a mimek unben tinani'.

¹⁸Ach in Diosal, manchak in a bekcanok, mawal yet icham inxa yet sakxa xil in jolom. Oktoc'al je' wuj walon el yabixal a miman ipejal bay eb ok aljokc'al yet bak'in.

¹⁹Ach Dios, yelxac'al miman a tojolc'ulalil. Chic'al apnitac'al bay satcan. Mimek tzet yetal mayal onej. ¡Tok ayto wal mactxel axca wal ach!

²⁰Caxc'al xiwilxa tzet yetal max quin oni, c'al yailal max ak' ayin, palta okto ak' wiquisal yin aq'uil junelxa. Ok in e ajtek yul c'ul tx'otx' tx'otx'.

²¹Ok acan oc tz'ak in mimanbilal axa in a mimanc'ulnen tu'.

²²Axa ayin ti', ok in bitnok ayach, yuj chak' yun tzet chala', cax ok walon yuj diosalil yin arpail c'al yin wajabil, ach in Diosal, ach ton Diosal ach Israel.

²³Ok aj waw yin tzalojc'ulal yet ok ach in bitnej, yujtol max in a colo'.

²⁴Ok walil a tojolal masanil c'ual. A eb chi yochej ay tzet chin oni, max ayc'ay eb, max cancan eb yin mimek q'uixwilal.