Read Q'anjob'al Sal 72 Bible Online

Sal 72 - Q'anjob'al bible

Sal 72

¹Bit yet Salomón Ach Dios, ak' a tojolal c'al a watx' nabal bay cham rey ti', a ton is c'ajol cham rey sic'bil el oj,

²yet watx' yinc'al tojolal, c'al yin watx' nabalej chi yun yak'on yajawilal bay a conob, c'al bay eb a meba'.

³Ayokab junc'ulal c'al tojolal xol conob.

⁴Yak'okab cham rey tojolal bay eb meba'. Col-layokab el eb ayoc yin majilal, cax chi tec'on ay eb chi yetnej yet animail.

⁵Yaokab ay ba a conob ayach yin tojbalk'inal, yak'ban ayto c'u, c'al xajaw.

⁶Lajanokab cham rey axca nab, ma axca yal ak'bal chi aon oc yal tx'otx' tx'otx', c'al an ac'un yuj.

⁷Ajokab can watx'ilal, c'al tojolal yul is tiempo is yajawil, masantac'al yet c'amxa xajaw.

⁸Yak'okab yajawil bay ti a' mar, masantac'al bay ti' junxa mar, bay ti a' miman Éufrates, masantac'al bay tilakil el tx'otx' tx'otx' ti'.

⁹A eb ajc'ul oc yin cham, a ton eb cajan bay tz'inan tx'otx', yak'okab ba eb bay cham yin mansoc'ulal.

¹⁰A masanil eb rey yet Tarsis, c'al eb cajan bay tilak a' mar, mawal eb rey yet Sabá, c'al eb yet Seba, yak'okab eb sabalej c'al tojlabal bay cham.

¹¹Ayokab jajan masanil eb rey bay cham. Ak'layokab serbil cham yuj masanil nacionlak.

¹²A cham ok colon el eb meba' chi yal ba bay, yetok c'apax eb ayoc yin majilal tol c'am mac chi coloni.

¹³Ok cusaj c'ul cham yuj eb ayilwom. A eb meba' ok col-lay el eb yul k'ab camich yuj Cham.

¹⁴Ok col-lay el eb bay eb etnem anima, c'al bay eb yaxc'ayinak c'ul, yujtol miman yelapnok is k'inal eb yul sat cham.

¹⁵Iquisokab c'al cham rey. Ak'layokab ch'en oro yet Sabá bay. K'anlayokabc'al cawil cham bay Dios, watx'okabc'al yet cham.

¹⁶Xiwilokab ixim trigo yul conobal, xiwilokab ixim bay jolomlak witz. Ch'ibokab trigo axca chi yun ch'ib te te' bay Líbano, axca an ac'un sat tx'otx'.

¹⁷Nalayokab cham rey yin tojbalk'inal. Mayjokokab is mimanbilal cham axca c'u. Chaokab masanil nacionlak watx'ilal yuj cham. Yalokab eb tol watx' yet eb.

¹⁸Al-layokab watx' k'anej bay Jehová Dios, Cham co Diosal ayon Israel on ti'. Asannej ton Cham chi unen tzet yetal c'ayubtak.

¹⁹Al-layokab watx' k'anej bay Cham yin tojbalk'inal. Il-layokab is mimanbilal Cham bay masanil tx'otx' tx'otx' ti'. Yunokab axca tu'.

²⁰A cayti' chi lajwi is txaj cham David is c'ajol cham Isaí.