Read Q'anjob'al Sal 77 Bible Online

Sal 77 - Q'anjob'al bible

Sal 77

¹A bit Asaf ti' Max wal in ba bay Dios yin ipejal, yet watx' chi yab Cham.

²Chin txajli bay Cham Yajaw yet ay in cusc'ulal. C'amc'al chin bek in mojban in k'ab junjun ak'bal, palta a wanimail c'amc'al chi yi' is mimanc'ulal.

³A yet chin naontek Dios, chin ok'i, chi c'oli in naontek, cax chi cabax aj in c'ul.

⁴Mamin, c'am chin a cha' wayok. Manxa animaok ay in c'ul, cax c'am chi je' in k'anjabi.

⁵Chin natek juntzan c'ual, c'al yabilal yet yalantok.

⁶Naan wuj tinani' yet chin bitni yet ak'balil. Chin na' yul in c'ul, yet chin k'umen in ba.

⁷¿Tok mi wal cac'al ti' yowal Cham Yajaw win? ¿Tok mi wal tol c'amxa chin yochej Cham?

⁸¿Tok mi wal mayal lajwican el is camc'ulal Cham? ¿Xam lajwi aj is yalben Cham yin junelnej?

⁹¿Tok mi wal max tojcan c'ayc'ulal is watx'c'ulal Dios? ¿Yelc'al mi tol ow Cham, cax c'amxa mi is yabenc'ulal?

¹⁰Ay tzet yetal yelxac'al ya' chi wabej, yujtol chi walaj yul wet: Tol a is yipalil Cham Axac'al Ocok, c'amxa oc jetok tinani', cax man axcaok yet yalan, quin chi.

¹¹A tinani' xin, ok in natek onben c'ayubtak yoqui max ak' ayon yet yalantok.

¹²Ok in natek masanil tzet max onej.

¹³Ach Dios tx'ok yel masanil onben. ¿Baytowal ay junokxa dios puch miman yelapnok chach lajbani?

¹⁴Ach ti', Dios ach, watx'nemal ach tzet c'ayubtak yoqui. Max ak' ojtaknelay el epalil bay nacionlak.

¹⁵A yetok epalil tu' max a colcan el a conob, a ton yinatil Jacob c'al José.

¹⁶Ach Dios, a wal yet max ach yilon a' mar, max xiwcan aj a'. Max bilaj a' masantac'al bay najatil yich a'.

¹⁷Max bek aytek asun is nabil, cax max bil c'u bay satcan, xiwil rayo bay masanil sat tx'otx'.

¹⁸Max ablay bil c'u xol cakxuchum. A a rayo max yak' sakilk'inal yulyibank'inal. Max bilaj tx'otx' tx'otx' ti' yuj.

¹⁹A bay yul a' mar max a jak a be, cax xiwil aejlak bay max ach eq'uelok, palta c'am mactxel max ilontek yechel akan.

²⁰Max e' bey a conob axca no calnel. Max a k'anbalnej Moisés c'al Aarón yin yikban a conob tu'.