Read Q'anjob'al Sal 79 Bible Online

Sal 79 - Q'anjob'al bible

Sal 79

¹A ton bit Asaf ti' Ach co Diosal, mayal wal octok eb conoblak yul a tx'otx', mayal yetnejtok eb a templo, max yuchaj eb Jerusalén.

²Max yak' cam eb a chekbej tol ikem ayach, max yak'on eb chi' no ostoc c'al no chiwajwom no'.

³Max yak'on pul eb chiq'uil anima bay yinlak conob Jerusalén, axca wal pul a' aej, cax c'am mactxel chi mukon eb.

⁴Xiwil chon buchlay yuj eb cajan co cawilal, tzeyejtak on yuj eb oyan oc jin.

⁵Mamin Jehová, ¿jantakto wal tiempo ow achc'al ayon xin? ¿Ac'ala'c'al mi tit a k'ak'alc'ulal jin axca chaw k'ak'ej?

⁶Ajokab can tit yowal a c'ul yin conoblak, tokwal ojtakbil ach yuj eb, tamwal chach yak' binaj eb.

⁷Yujtol max on c'aylay el ayon yinatil on Jacob ti' yuj eb, cax max yetnejtok eb co conob on.

⁸Manchak ak' co tojlanej is mul eb jichmam on. Jayokab a watx'c'ulal jiban yin aymanil, yujtol manxa animaok ay co c'ul on.

⁹Ach Dios, toc'alta' co Colomal ach. Ocan jetok xin, colwajan jetok; cha joc'ay co mul on yuj a mimanbilal.

¹⁰Tzet yuj xan wal ok yalaj eb conoblak: ¿Baytal ay is Diosal eb tu'? ẍi eb. Ak' jilon yec'can pak eb a chekbej max mak'lay camok, yabokab c'apax eb tx'ok conoblak jun tu'.

¹¹Lanan yalon ba eb aj preso ayach; ocan t'anan yin eb. Yuj epalil colcan el eb ijan oc camich yin.

¹²Mamin Jehová, ican ec' a pak ukelok bay juntzan nación ay co cawilal on, yuj is buchwal k'anej eb en.

¹³Axa ayon a conob on ti', axca tol a calnel on, toc'alta' ok jal yuj diosalil ayach. Ok co bitnej watx' k'anej ayach yin tojbalk'inal.