Read Q'anjob'al Sal 81 Bible Online

Sal 81 - Q'anjob'al bible

Sal 81

¹A bit Asaf ti' Bitnanek yin tzalojc'ulal bay Dios Cham Jipomal. Awjanek yin tzalojc'ulalil, cax che bitnen co Diosal ayon yinatil on Jacob ti'.

²Bitnanek yetok pandereta, yetok arpa watx' bili, c'al yetok salterio.

³Xuek ch'en trompeta yet unin xajaw. Xuek c'apax ch'en yet chi tec'ay xajaw yet miman k'in yet co tzalojc'ulal.

⁴Tix jun miman chekbanil max yak' Dios ayon Israel on ti', ayon yinatil on Jacob. Max al-lay c'apax ayon yinatil on José ti',

⁵yet max toj Dios ak'oj owal bay Egipto, max jab jun tiej maj nachaj el juj.

⁶Max yalon Dios: Mayal wican el e yikatz yin e yichin. Mayal wican el e yiban jun mulnajil caw wal ya'.

⁷Max in e yawtej yet ayextok xol e yailal, cax max ex in coloni. Max in tak'wi ayex xol asun bay chi bil c'u. Max ex wak' porobal bay a' aej yet Meriba.

⁸Ex in conob, abxalwanek ayin, ayin chin k'anjab ayex. Ex Israel, matawal ikem ex ayin.

⁹C'amokab is diosal eb tx'ok conobal ayic' ayex. Manchak ex ay jajan bay tx'ok diosal.

¹⁰Ayin ton Jehová e Diosal in, ayin ton max ex wieltek yul is makbej Egipto. Jakek e ti', cax ayin ok ex in lotzej, quin chi.

¹¹Palta maj yal e c'ul ayex in conob ex ti' max ex abxalwi ayin, maj yal e c'ul ayex Israel ex ti' max e yikej ayin.

¹²Yuj tu' xan max ex in bekcantok yin e tenomtakil, cax max e yak'on e nabal axca chi yochej e c'ul.

¹³Ex in conob Israel, matawal che yab tzet max wala', matawal chex tojc'al yul in be.

¹⁴Yin mi wal jun mutz'satil chi wak' ayc'ay eb ajc'ul oc e yin, chi mi waoc yailal yiban e yajc'ul tu'.

¹⁵A eb c'am chin ocheni, chi mi ay moc'an eb yuj xiwc'ulal, axa yailal eb, chi mi beytok yin tojbalk'inal.

¹⁶Palta chi mi wak' miman loj ayex, a mi wal ixim trigo watx' ay ayex, chi mi tzaloj e c'ul e yuq'uen yalcab ay bay satlak ch'en, ẍi Jehová.