Read Q'anjob'al Sal 85 Bible Online

Sal 85 - Q'anjob'al bible

Sal 85

¹A ton bit eb yinatil Coré ti' Mamin Jehová, yelxac'al tol watx' ach bay jun a conob ti' max ak' meltzoj co tzalojc'ulalil ayon yinatil on Jacob ti'.

²Max a joc'ay co yobc'ulalil ayon a conob on ti', max ak' tan masanil co mul on.

³Max a mitx'oc waan yowal a c'ul, c'al a k'ak'alc'ulal.

⁴Ach co Diosal, ach co Colomal, ocan jetok junelxa. Manchakc'al aj can tit owal jin on.

⁵¿Tok mi wal cac'al ti' tit owal jin on?

⁶¿Majxa mi wal ak' co cawil on, yet watx' chon tzalojbi aj oj, ayon a conob on ti'?

⁷Tx'oxcan a camc'ulal ayon ach Jehová, cax chon a coloni.

⁸Ok wab tzet yetal ok yal Cham Jehová Dios ayon. Ok yak' Cham junc'ulal ayon is conob on ti', asan tol c'amxaokab chi jun yin c'am nabalil.

⁹Yel wali, cawil ayic' Dios, yuj colwaj bay eb chi ion can Cham, ok il-lay is tzekekial Cham bay co tx'otx' on.

¹⁰A camc'ulal c'al ikemalil ok chalej ba, axa tojolc'ulal c'al junc'ulal ok lak'lej ba.

¹¹A ikemalil tzanc'al bay ok ajol yul co tx'otx'al on, axa tojolc'ulalil ok tit t'anan tac'al satcan.

¹²A wal caw Jehová ok ak'on watx'c'ulal, axa wal satni el co tx'otx' ti' bian.

¹³Axa tojolal ok tit satak Jehová, cax a' ok watx'nen is be Cham.