Read Q'anjob'al Sal 86 Bible Online

Sal 86 - Q'anjob'al bible

Sal 86

¹A ton bit David ti' Chaokab a c'ul quin aben Mamin Jehová, yujtol ok'bal in c'ul, cax xiwil chin cusi.

²Colin elok. Ilabi, yikem inc'al ayach. Colin el a chekbej in ti', yujtol ach chach waoc yipok in c'ul.

³Ok' wal a c'ul win Mamin Jehová, masanil c'u chi wal in ba ayach.

⁴Mamin, ak' tzaloj in c'ul ayin a chekbej in ti', yujtol a ayach chin txajli.

⁵Yujtol watx' ach Mamin, ak'om ach tan yobtakil. Toc'alta' ay a camc'ulal yin eb chi yal ba ayach.

⁶Mamin Jehová, ab in txaj xin, yet chin k'anon a yabenc'ulal wiban.

⁷Yet manxa animaok ay in c'ul chi walon in ba ayach. Chi wil xin tol toc'alta' chin a tak'wej.

⁸Tokwal ay junokxa Dios axca wal ach Mamin Jajawil. Tokwal ay juntzanokxa unben chi lajban et Mamin.

⁹A ach Mamin, max a watx'nej masanil mimek conoblak. Ok jay eb yaon ay ba ayach, c'al ul yalon eb watx' k'anej en.

¹⁰Yujtol asan wal ach Dios ach, cax miman ayji ocok, cax c'ayubtakxac'al yoc tzet chonej.

¹¹Tx'ox a be ayin Mamin Jehová, yet watx' chin tojcan yul a be tu' yin ikemal. Ak' yun in nabal ti', yet chach ilay can wuj.

¹²Ach Wajawil, ach in Diosal, ok walc'alta' watx' k'anej en yin masanil in c'ul. Toc'alta' ok ach wi can yin tojbalk'inal.

¹³Yelxac'al miman a camc'ulal win, majto in a cha' ayc'ay bay mukbanil camnak.

¹⁴Ach Dios, jun wal bulan eb ch'aan chi tit win. C'am yabenc'ulal eb; chi yochej eb chin yak' camok. Man txequelok ayji yul sat eb.

¹⁵Axa ach Mamin, Diosal ach yabenc'ulal, cax miman a camc'ulal jin on. Yelxac'al tol man c'unok tit yowal a c'ul, palta caw wal watx' a c'ul, chak'c'al yun tzet chal ayon.

¹⁶Ilintek, ok'wal a c'ul win. Colin elok, ayin a chekbej in ti', cax ak' epalil ayin.

¹⁷Ak' wil watx'il a c'ul yin tx'ijanil, axa yet ok wilon oc eb ajc'ul oc win, ok q'uixwok aj eb yujtol ach Jehová chach colwaj ayin, cax chin a mimanc'ulneni.