Read Q'anjob'al Sal 89 Bible Online

Sal 89 - Q'anjob'al bible

Sal 89

¹Bit cham Etam Ezrahita Ok walc'alta' yin in bit Mamin Jehová, tol toc'alta' watx' a c'ul. Ok walil yin tojbalk'inal, tol yel wali chak' yun tzet chala'.

²A yabixal a camc'ulal tol ayc'al yin tojbalk'inal ok walilok, tol c'am chi q'uexlajbi tzet chala', cax lajan yak'on yetok satcan.

³Ay jun a trato yetok David; max ak' a ti' bay a chekbej sic'bil el oj. Max alon bay axca ti':

⁴A eb enatil yet bak'in ok wacan oc eb yin reyalil a q'uexelok, cachi.

⁵Ach Jehová, masanil eb aj satcan chi bitnej eb onben c'ayubtak, yujtol chak' yun tzet chala'.

⁶C'am junokxa dios, tamwal junok bay satcan chi je' lajlen ba etok, ach Jehová.

⁷Caw miman elapnok xol eb ángel, cax caw wal ay a mayk'ak'al yintak eb oyan oc enlak.

⁸Ach Jehová Yajaw Ach Yin Masanil, ¿mac wal junokxa lajan etok? Chic'al je' oj masanil, chic'al ak' yun masanil tzet chala'.

⁹Yul a k'ab ayic' a' mar yet chi owbi, chak' numay a' yet chi bil a'.

¹⁰Max a tec'ay no no' ay is may yul a' mar, axca tol camnakxa. Max a saklemnej eb ajc'ul oc en yuj yipalil a k'ab.

¹¹A satcan c'al tx'otx' tx'otx' et toni; ach max a watx'nej yulyibank'inal, c'al masanil tzet yetal ay bay.

¹²Ach max esnej ajtac'al bay norte, masantac'al bay sur. A juntzan witzlak axca Tabor, c'al Hermón, chi bitni ayach.

¹³A a k'ab xiwil yip, a a watx' k'ab chic'al je' yuj masanil.

¹⁴Tec'an waay ekbej yin a tojolal. A yin masanil chi txecloj el a camc'ulal, cax tol chak'on yun tzet chala'.

¹⁵Ach Jehová, ay tzalojc'ulal eb anima chach bitneni; yujtol ayach ec' yetok eb, xan chi el lenaj chi yil eb.

¹⁶A wal en chi yak'c'al eb tzalojbok c'ul, axa a tojolal ok ion aj can eb.

¹⁷Wal yel, ach ton chak' mimek ipejal ayon, cax yuj a watx'c'ulal xan chic'al je' juj.

¹⁸Ach Jehová, max ak' co Colomal. Ach co Diosal ayon Israel on ti', max ak' co Reyal on.

¹⁹A yet payxa tu', max ach k'anjab yin ilwalil, max alon bay eb a chekbej ikem axca ti': Max quin oc yetok jun soldado mimanbil, max wiaj can jun mactxel sic'bil el wuj xol in conob.

²⁰Max ilchaj in chekbej David wuj, a yetok waceite yet sic'wal max in tx'oxo', tol reyxa toni.

²¹Man ok oc wanaj in colwal bay, yujtol a wipalil ok oc yipalok.

²²A eb ajc'ul oc yin, maj je' yoc mitx'naj eb yin. A eb unem yobal, man ok tzakay eb bay.

²³Satak wali, ok in tec'can ay eb ajc'ul oc yin, ok wak'on cam eb chi chichon oc c'ul yin.

²⁴Ok in ayjokc'al ec' yetok, yujtol ay in camc'ulal yin, c'al wak'on yun tzet chi wala'. Wuj wali xan ok je'c'al yuj.

²⁵Ok wak' mimanbok is makbej. Ok chail yich bay a' mar Mediterráneo masantac'al bay a' miman Éufrates.

²⁶Ok yal nak ayin: In Mam ach ach ti', cax in Diosal ach; in Colomal achc'alta'a, cax chak'on wip, ẍi nak.

²⁷Ayinxa ok wak' sataknej is satak babel unin. Yelxac'al miman satak nak yintak masanil eb rey.

²⁸A in camc'ulal yin nak man ok c'ayok. A in trato yetok nak, man ok q'uexc'on ec'ok.

²⁹A eb is yinatil ok yak' reyalil wuj is q'uexelok, ok beyc'altok yet ayto ec' satcan ti'.

³⁰Palta ta ok bekcan eb yinatil nak in cuybej, cax manak tzet chi wala' chi beybalnej eb,

³¹ta c'am chi beybalnej eb in beybal, cax c'am chi yikej eb in k'anej chi wak' yunej,

³²ok waoc yailal eb yetok c'ax, yuj is yec'nakilal eb, c'al yuj is yobc'ulal eb.

³³A pax David xin, man ok in bek in camc'ulneni, man ok in bek wak'on yun walben bay.

³⁴Man ok wetnejtok in trato yetok. Ok wak'c'al yun tzet max wal bay.

³⁵Yin junelnej max wak' in ti' bay David, cax ayin caw max wak' in ba yin testigoal tol man ok in q'uexa'.

³⁶A is yinatil ok yak' reyalil is q'uexelok, yak'ban aytoc'al ec' c'u ti'.

³⁷Tol tec'anc'alta' yayji eb yak'on yajawil, axca yayji xajaw bay satcan, cachi.

³⁸Axa tinani' Mamin, max a cabc'ulnej cham rey tol ach max a sic'a', cax max entaknej elok. Max tit owal yin cham.

³⁹Max etnejtok a trato bay a chekbej. Max k'okcan el is corona sat tx'otx'.

⁴⁰A bay masanil is murallail conob max otcantok yin belakil. Max occan yin conobben is conoblak cham oj.

⁴¹Axa masanil anima chi ec' bay tu', chi yelk'anej eb tzet chi cha' c'ul. A eb cajan ec' is cawilal chi buchon eb.

⁴²Max ak' yun eb ajc'ul yin cham yion aj eb k'ab can yuj tzalojc'ulal.

⁴³Max ecan el ye is yespada cham, maj ach oc yetok yet max oc owal.

⁴⁴Max ak' tan is mimanbilal. Max a k'okay is trono sat tx'otx'.

⁴⁵Max a c'otxbanej is k'inal, cax miman max yun eon el is q'uixwil.

⁴⁶Ach Jehová, ¿bak'in ok a bek a c'uban el a ba? ¿cac'al mi tu' yowal a c'ul axca junok k'ak'ej?

⁴⁷Mamin, natok tol a in k'inal c'otxan toni. Txennej co k'inal ayon anima on ti' tol watx'nebil on oj.

⁴⁸C'am junok anima tol iquisc'al, cax tol c'am chi cami. C'am mactxel chi je' colon ba bay mukbanil camnak.

⁴⁹Mamin, ¿baytal ay a camc'ulal max a tx'ox yet yalantok, tol max ak' a ti' bay David, tol ok ak'c'al yun tzet chala'?

⁵⁰Ach Mamin, natok tol xiwil chi tx'emwaj eb jin ayon a chekbej on ti' yuj eb nacionlak, ay wal ec' is tx'emwal eb yin in c'ul.

⁵¹Ach Jehová, tix ton wal is yobc'ulal eb ajc'ul oc en. Tix ton wal chi yun tx'emwaj eb yin junjun txolan yin a chekbej tol sic'bil el oj.

⁵²¡Al-layokab watx' k'anej bay Cham Jehová yin tojbalk'inal! Yunokabi.