Read Q'anjob'al Sal 9 Bible Online

Sal 9 - Q'anjob'al bible

Sal 9

¹A ton bit David ti' Mamin Jehová, yin masanil in c'ul chi wochej chi wal in watx' k'anej ayach, cax chi walon el yabixal masanil onben c'ayubtakxac'al yoqui.

²Axac'al Ach Oc Dios. Oj wali xan chi yochej in c'ul chin bitni yuj in miman tzalojc'ulalil. Chi wochej chach in bitnej.

³A satak wali, ipan yelcan aj eb ajc'ul oc win, chi telc'oj eb cax chi cam eb.

⁴Yajaw ach yin tojolal. Max ach ay chotan bay a trono, cax max a watx'nejcan el in k'anej.

⁵Max ak' owal yin eb conoblak, max a c'aycan el eb unem yobal, max a joc'ay bi eb yet watx' c'amxa chi nalaytek eb yet bak'in.

⁶Mayal cam eb ajc'ul, max c'aylay el conobal eb yin junelnej. Ach max ak' c'ayilok, cax c'amxa junok max cani, yet watx' c'amxa chi nalaytek.

⁷A pax ach Jehová, toc'alta' Rey ach yin tojbalk'inal, max acan oc a trono yet chach beyc'ulnewi.

⁸Ok a beyc'ulnej jun yulyibank'inal ti' yin watx'il. Ok ach yajawbok bay conoblak yin tojolal.

⁹Ach Jehová cha colil eb chi etnelayi, chak'on yip eb yet ayoc eb yin mimek yailal.

¹⁰Mamin Jehová, a eb ojtaknen ach, a ton eb ti' yip ach c'ul eb, tutun wal c'am bay cha bekcan eb chi oc ayilal ayach.

¹¹Bitnanek bay Jehová, Cham Yajaw bay Sión. Alek yabix eb conob yin tzet max yun Cham.

¹²Man toc'alok chi yiloc Dios eb mak'om cam anima, c'am chi tojcan c'ayc'ulal is yailal eb ayoc yin bilc'ulal.

¹³Mamin Jehová, ok' wal a c'ul win, ilintek, tol ya' chin ec' yuj eb c'am chin ocheni. Colin el bay camich.

¹⁴Catawal tu bian, axa bay puertalakil Jerusalén ok wal bay masanil anima, tol a moj wal yal-lay watx' k'anej ayach, tol chin tzaloji, yujtol max in a colcan elok.

¹⁵A eb conoblak, max ayc'ay eb bay yul olan max watx'nej eb. A yakan eb chi michchaj el yuj tx'an yal eb.

¹⁶Max ojtaknelay Jehová yuj is watx'c'ulal max yunej, ac'al oc nak unem yobtakil max yalnej ba.

¹⁷A eb unem yobtakil, c'al eb chi tojcan c'ayc'ulal Dios yuj, ok tokcan eb bay camich.

¹⁸Man yinok tojbalk'inal chi tojcan c'ayc'ulal eb meba'; man yinok tojbalk'inal chi cancan eb yalan yin tzet yetal chi yochej is c'ul eb.

¹⁹Ajan wan Mamin Jehová, manchak aj can mimanen ba eb anima en. Itek conoblak a satak Mamin, cax chak'on lowbanil yin eb.

²⁰Acan oc eb yin xiwc'ulalil Mamin. Ak' yojtaknej el eb tol animac'al wal eb.