Read Q'anjob'al Sal 90 Bible Online

Sal 90 - Q'anjob'al bible

Sal 90

¹A txaj Moisés is chekbej Dios Mamin, toc'alta' co colbalba ach yettaxc'al yichbanil.

²Yettaxc'al c'amto chesnej aj witzlak, c'al yulyibank'inal ti', masantac'al yet lajubal, Dios achc'alta'a.

³Ach chon ak' meltzoj yin pokokal junelxa, yet chaloni: Ex anima, meltzojanek yin pokokal junelxa, cachi.

⁴Yel wali tol a mil abil, lajan axca yet ewi yul a sat, axca jayebok hora yet ak'balil.

⁵Yin aymanil chon e beyok. Axca wal yeq'uel junok wayichej, caywal ton tu' jayji on.

⁶Lajan on axca an ac'un chi ajolok. Chi titnaj xumaquil yet k'inibalil, axa yet chi aycan aj c'u xin, chi takilok, cax chi cam an.

⁷Yel wali, a yowal a c'ul chon ak'on c'ayilok. ¡Manxa animaok chi yuncan el co c'ul yuj!

⁸A co mul on, c'al co yobc'ulalil on, txequel yayji a satak.

⁹Yel wali, a yuj yowal a c'ul xan chi lajwi ay co k'inal on. Ayman chi ec'can el co k'inal jiban, axca junok ibal cak'ek'.

¹⁰Asan 70 abil jiquisal. Axa eb tec'an xin, chi ajapnok eb yin 80 abil. Palta yinxac'al yatakilal, c'al etnejc'ulal chi yun yeq'ui. Yin aymanil chi ec'can el jiquisal, cax chon c'ayajok.

¹¹¿Mactxel ojtaknen yipal yowal a c'ul? ¿Mactxel ojtaknen xiwc'ulal yet yowal a c'ul tu'?

¹²Ak' jojtaknej on tol txennej co k'inal, yet watx' chon beytok yin jelanilal.

¹³¡Mamin, occanc'al jetok! ¿Jantakto tiempo ok ach mayjok xin? Ok' wal a c'ul jin ayon a chekbej on ti'.

¹⁴Yet junjun k'inibalil chak' tzaloj co c'ul on yuj a camc'ulal, axa co bitni yin tzalojc'ulal tu' yak'ban iquis on.

¹⁵Chi jochej xiwil yabilal a tzalojc'ulal chak' ayon, axca wal bisil yabilal co yailal on.

¹⁶Elokab yin a c'ul, tol ayon a chekbej on ti', c'al jinatil, chi jil onben c'ayubtak, c'al a mayk'ak'al.

¹⁷Ayokab watx'il a c'ul jiban on Mamin, tol co Diosal ach. Ak' mayjok co mulnajbal. Yel toni mayjokokabc'al co mulnajil on tu'.