Read Q'anjob'al Sal 91 Bible Online

Sal 91 - Q'anjob'al bible

Sal 91

¹A mactxel cajan ec' yalan yewanil colwal Jehová Cham Axac'al Ocok, Cham chic'al je' yuj masanil,

²chi yal bay Cham axca ti': Ach ton wenel ach, c'al in xewbejal ach. Axca tol in cuartel ach, in Diosal ach bay ayoc yipok in c'ul, ẍi bay Dios.

³Asannej wal Cham chi je' ach colon el bay yal, tol yin ewantakil ay ayok, c'al bay ilya' tojol yoc camich yuj.

⁴Ok ach mojlay aj yuj, axca tol ay is xic', cax c'am tzet ok ach on bay tu'. A ok ach colon elok, axca chi yun col-lay junok yuj ch'en makbal julbalej, yujtol chic'al yak' yun Cham tzet chi yala'.

⁵Man ok ach xiw bay tzet yetal ay is may chi ec' yet ak'balil, tamwal bay julbalej chi alaytek en yet c'ualil.

⁶Man ok ach xiw bay ilya' chi jay xol k'ekk'inal, tamwal bay c'aybanil chi ak'on cam anima yet c'ualil.

⁷Ay mil anima ok cam bay a q'uexan, c'al lajonebok mil bay a watx' k'ab. Axa ach xin, c'am tzet ok ach onok.

⁸Asan tol ok ela' tzet yetal is moj chaon eb yobtakwom.

⁹Yujtol max oc Cham Jehová, Cham Axac'al Ocok a Colomalok,

¹⁰man ok cha ba tit ilalej eban, man ok apnok ilya' bay a na.

¹¹Ok chektek Cham eb is yángel, yet watx' chach taynelay bayc'al chi ca a toji.

¹²Ok ach quetzlay aj yuj eb, yet watx' c'am cha chipil akan yin ch'en.

¹³Ok je' a tec'on ay no labaj, caxc'al a no owal labaj; ok je' c'apax a mak'on cam no coj, caxc'al miman no'.

¹⁴Chi yal Cham Jehová: Ayin ok in colcan el eb mactxel chin camc'ulneni. Ok in oc yenelok eb, yujtol chin yaloc eb is Yajawilok.

¹⁵A yet ok in yawten eb, ok in tak'wok bay eb. Ayin caw ok in ayjok ec' yetok eb, ok in colcan el eb yin is yailal, cax ok wion aj can eb.

¹⁶Miman is k'inal eb ok wak'a', yet watx' chi yak' eb nabal yiquisbi. Ok wak' yil eb in colwal, ẍi Cham.