Read Q'anjob'al Sal 92 Bible Online

Sal 92 - Q'anjob'al bible

Sal 92

¹Bital yet c'ual xewilal Ach Jehová, Axac'al ach Ocok, manxa watx'ilok jalon yuj diosalil ayach, c'al co bitnen bit ayach yuj ach jion can.

²Manxa watx'ilok ta a yet k'inibalil c'al yet ak'balil chi jalon el yabixal a miman camc'ulal, c'al tol chak' yun tzet chala'.

³Manxa watx'ilok ach co bitnen yetok masanil pojanil wajab, c'al arpa tol watx' yul is nuk'.

⁴Ach Jehová, ach max quin aoc yin tzalojc'ulal yuj onben, chin bitni yin tzalojc'ulal yuj onben ti'.

⁵¡Mamin Jehová, c'am axcaxa is mimanbilal juntzan onben ti'! ¡C'am mactxel chi tzakay nabal entak!

⁶Asan eb chi ec' yiban, c'al eb c'am nabal, c'am chi nachaj el yuj eb,

⁷ta chi aj can eb ajmul c'al eb yobtakwom axca ch'ib an ac'un, cax chi oc eb beyomal, palta junnej bek toni, cax chi toj eb bay c'aybanilej yin junelnej.

⁸Axa ach Mamin Jehová, Axac'al ach oc yin tojbalk'inal.

⁹Yel ton Mamin Jehová, ok ak' c'aylay el eb ajc'ul oc en. Masanil eb unem yobal ok ak' saklemnelay eb.

¹⁰Lanan eon can wipalil, axca yipalil junok no xolakilteal toro, cax chak'c'al ac'bok wip yetok tzalojc'ulal.

¹¹Yowalil ok wil yayc'ay eb ajc'ul oc win. Cax ok waben k'akwi eb unem yobal tu'.

¹²A eb anima watx' nabal, ok aj can eb axca xumaquil palma, cax ok ch'ib eb axca wal te c'ute' bay Líbano.

¹³Yujtol cajanc'al ec' eb bay templo Jehová, ok aj can eb yujtol ayic' eb cawilal co Diosal.

¹⁴Toltax yet icham animaxa eb, lajantoc'al eb axca te te' chitoc'al satni, tec'antoc'al yili yip eb.

¹⁵Cax ok tx'oxon eb tol a Jehová Cham Wipomal tojol toni, c'am yobc'ulal yin Cham.