Read Q'anjob'al Sal 94 Bible Online

Sal 94 - Q'anjob'al bible

Sal 94

¹Mamin Jehová, tx'ox a ba tol Diosal ach, cax iom ach ec' pak.

²Juezal ach yulyibank'inal ti', ajan wan satak eb chi mimanej ba, cax ak' paktzil bay eb, atac'ala' is mojalil.

³Mamin Jehová, ¿jantakto wal tiempo ayoc eb unem yobtakil yin tzalojc'ulalil?

⁴Masanil eb yobtakwom tu' chi luesnej ba eb, chi maynej ba eb yin is yobtakwomalil tu'.

⁵¡Ay, Mamin Jehová! Chi yetnejtok eb a conob, c'amxa tzet chi yal a conob tu' yuj eb.

⁶Chi yak' cam eb eb xal ix camnakxa yichamil, c'al eb anima tx'ok is conob; chi yak' c'apax cam eb eb unin c'amxa mam c'amxa txutx.

⁷Chi yalon eb axca ti': C'am chi yil Jehová. Man ab yojtakok is Diosal Jacob tu', ẍi eb.

⁸Abek ex anima pit, tol c'am e nabal, ¿bak'in ok nachaj el e yuj?

⁹A Cham max watx'nen txiquinej, ¿tokwal man ok yab Cham tzet chi al-layi? ¿Tokwal man ok yil Cham, tol a' max watx'nen bak'satej?

¹⁰A Cham chi ak'on cuenta mimek conoblak, ¿xin tawal man ok yaoc Cham yailal? Tokwal man ok yojtaknej el Cham tol a' chon k'aytzen yin ojtakbilal.

¹¹A Jehová, yojtak tol a tzet chi co na' ayon anima on ti', c'am ton yelapnok.

¹²Mamin Jehová, tzalojc'ulalil yet mac chak' cuenta, cax chak'on a cuybej bay,

¹³yet watx' c'am tzet chi na' yet chi apni yatakilal bay, yak'ban chi yechbanej watx'nelay tx'otx' olan bay ok ayc'ay mac yob nabal.

¹⁴Yujtol man ok bekcan Jehová is conob. Man ok bekcan eb yet-xa tu' yin tx'oklil.

¹⁵A tojolal ok yi' yip yulak juzgado junelxa. Axa eb anima watx' nabal, ok yaoc eb yip jun tojolal tu'.

¹⁶¿Mactxel max in colon el yul k'ab eb yobtakwom c'al eb unem yobal?

¹⁷Tawal tol maj in col-lay el yuj Jehová, ayin xam ec' bay tz'inanil camich tinani'.

¹⁸A yet max in naoni: Lananxa in telc'oji, quin chi; axa wal a camc'ulal, Mamin Jehová, max in mitx'on waayok.

¹⁹A yet xiwil tzet chin na', a yet tu' chin a mimanc'ulnej c'al ak'on in tzalojc'ulal.

²⁰Mamin, maj je' tol watx'xac'al ak'on yetok eb juez yob chi yut yilon yopiso, tol c'am chi beyc'ulnewi atac'ala' yalon ley,

²¹tol chi yetnej eb mac c'am mul, c'al yaon oc eb yin camich mac watx' beybal.

²²Axa in xin, a Jehová ayoc in colbanilok. A in Diosal ayoc wenelok.

²³A Cham ok paktzen bay eb yobtakwom yin yuchlay c'ay eb yuj is mul. A co Diosal ok uchon lajwok eb.