Read Q'anjob'al Sal 95 Bible Online

Sal 95 - Q'anjob'al bible

Sal 95

¹Sebaxek, co bitnejek Jehová yin tzalojc'ulalil, cax co bitnej Cham chon coloni.

²Ocokonek satak Cham yin aloj yuj diosalil, cax chi co bitnej bit yuj is mimanbilal.

³Yujtol a Jehová caw miman yayji ocok. A ton Cham miman rey yiban eb dioslak.

⁴Yul k'ab Cham ay juntzan mimek jobelak tol najat yich, yet c'apax Cham juntzan witzlak can is tel.

⁵A Cham ay yet a' mar, tol a' max watx'neni. A wal caw k'ab Cham max watx'nen c'apax tx'otx' tx'otx' ti'.

⁶Sebaxek, jak'ek ayilal yin jajanilal xin, a satak Jehová chi jiay co ba; ilab xin, tol a ton Cham max on watx'neni.

⁷A ton Cham co Diosal; axa ayon ti', is conob on Cham. Axca tol is calnel on Cham, xan taynebil on yuj. Chi yal Dios axca ti': Ta che yab tzet chi wal tinani',

⁸Manchak e pitnej e ba axca max yun eb e yichmam bay Meriba, axca max yun eb bay Masah bay tz'inan tx'otx'.

⁹A yet tu', max in yak' wal porobal eb e yichmam tu', ti' pax wal max yil eb juntzan wunben c'ayubtak yoqui.

¹⁰Cawinak abil puch ow inc'al bay eb, max walon axca ti': A juntzan anima ti' tx'okc'al bay ayoc is nabal eb. ¡Maj yojtaknej el eb in c'ulbal! quin chi.

¹¹Yuj wal tu', yetok wowal max wak'on in ti' bay eb: Tol man ok oc eb bay ok wak' xew eb, ẍi Cham.