Read Q'anjob'al Sal 98 Bible Online

Sal 98 - Q'anjob'al bible

Sal 98

¹Bitnejek ac' bit bay Jehová. Ilab tzet c'ayubtak max yun Cham. A Cham max on colon ayon is conob on ti', yuj is miman yipalil tol asan tojolal chi watx'nej.

²A Jehová max tx'oxon el is colwal, c'al is tojolal yul sat eb mimek conoblak.

³Maxc'al yun tzet max yal ayon is conob Israel on ti', cax max tx'oxon is camc'ulal ayon. Masantac'al bay lajub yulyibank'inal ti' max il-layi, tol max on col-lay yuj co Diosal.

⁴Bitnanek bay Jehová yin tzalojc'ulalil, ex cajyom bay masanil sat tx'otx' ti'. Ak'ek e nabal e bitnen bit bay Cham yin tzalojc'ulalil.

⁵Bitnejek bit bay Jehová yetok arpa, c'al yetok son tol ay is tx'anil.

⁶Bitnanek bay Jehová co Reyal yin tzalojc'ulal; bitnejek yin e xuon trompeta, c'al yin e xuon cacho.

⁷Bitnojokab a' mar yetok masanil no no' ay yul a', bitnojokab c'apax yulyibank'inal ti' yetok eb cajyom bay.

⁸A a' mimek aejlak, bilokab aj a'. Junlajanokab chi yun yawji mimek witzlak yin tzalojc'ulalil satak Jehová.

⁹Tol chi jay ul yak'on Yajawil yiban tx'otx' tx'otx' ti'. A Cham ok yak' Yajawil yiban conoblak bay yulyibank'inal ti', yin tojolal c'al yin junlajan.