Read Q'anjob'al Pr 1 Bible Online

Pr 1 - Q'anjob'al bible

Pr 1

¹Is k'anej cham Salomón, c'ajol David reyal Israel.

²Max tz'ibelaycanok, yet watx' chi al-lay el jelanilal, c'al cuybanilej, chi colwaji, yet watx' chi nachaj el juj juntzan k'anej tol ay wal yelapnok.

³Yuj xan chi je' co beybalnen jelanilal, watx'ilal, tojolal, c'al bay ijanilal.

⁴Yochwan cham Salomón tol chi aj can is nabal eb ach'ej tol c'am is nabal, tol chi ak'lay yojtaknej el eb, c'al yilontek ba eb.

⁵Yabokab eb aj nabal, yet watx' chi aj can yojtaknen eb; yabokab eb jelan, yet watx' chi aj can nachaj el yuj eb.

⁶A juntzan k'anej ti', chi colwaj yin co naon el tzet c'uan el yin is k'anej eb jelan, c'al tzetbil yayji juntzan k'anej pural chi nachaj el juj.

⁷A yichbanil acaw jelanilal, tol ayokab yelapnok Jehová yul co sat. A eb c'am is nabal, c'am chi yochej eb chi yi' is jelanil, c'al is cuybanil.

⁸Ach in c'ajol, cha ab a cuybanil chi wala', cax manchak entaknej el a cuybanil chi yak' a txutx.

⁹A yuj juntzan nabalej ti', ok watx'jok oc a beybal yuj, axca chi yun watx'ji aj eli yuj junok uej, ma yuj junok corona.

¹⁰Ta a eb yobtakwom chi yochej chach montejtok yetok, manchak a cha abej.

¹¹Tekan ok yal eb ayach axca ti': Ocan jetok, yet watx' chon makwaj yulak be yet chi co mak'on cam junok anima chi ec' bay tu', caxc'al c'am is mul ayon.

¹²Yul wal is cawil ok co mitx'oni, chi lajwi tu' ok co c'ayonxac'al elok.

¹³Catatu' ok jioncan masanil pojanil beyomal, cax ok jak'on noj co na yuj masanil tzet yetal tol ok jelk'anej.

¹⁴Sebach, ak' porobal a suerte jetok, ok jak'on et yin tzet yetal ok ji', ẍi mi eb.

¹⁵Ach in c'ajol, manchak ach toj yetok eb; a ti et, tol najat chach el yul is be eb.

¹⁶Yujtol yelc'ulal chi yak' eb yip yunen yobtakilal; toxac'al chi nanon eb yin mak'on cam anima.

¹⁷Tok ay yopiso junok yal chi ayi, tatol chi yil no tz'iquin tu'.

¹⁸A juntzan winak tu', is yalil eb chi yayok, ac'al oc eb chi mak'cam ba.

¹⁹A junok elk'om, bak'in mi ok camok; axca tu' ok yun cam eb chi yochej chi oc beyomal yuj yobtakil chi yunej.

²⁰A bay yulak calle c'al bay chi jayoc be, a bay txonbal c'al tzanc'al bay chi wajbaj ba anima, chon yawtej Dios, yuj yak'on co nabal.

²²A wal ayex ti' ex ach'ej, ex tol c'amto e nabal, toc'al chex buchwaji: ¿bak'in wal ok e bek e camc'ulnen jun e c'am nabalil tu'? ¿bak'in ok e bekcan e buchwaji, c'al e yintaknen el ojtakbilal?

²³Chaek e yab bay ok ex in tenchanej, axca tu' ok yun wak'on in c'ulbal ayex; ok wak' e yojtaknej el in k'anej.

²⁴Ayin ti', chex wawtej, yet watx' chex tit ayin, palta c'am che yochej che cha e yabej.

²⁵Axa chi yunej, tol che yintaknejcan el tzet chi wala', cax c'am che cha e yab in tenchebal.

²⁶Axa ok yun xin, tol ok in tzewok e yin yet ok jayoc yatakilal e yiban. Toxac'al ok in buchwaj e yin yet ok ex camel yuj xiwilal.

²⁷A wal yet ok jayoc xiwc'ulal, yatakilal, bilc'ulal, c'al cusc'ulal e yiban, axcaxac'al junok cakxuchum cak'ek' tol chi yak' lajwok masanil, caywal tu' ok e yunej.

²⁸A yet jun c'ual tu', ok in e yawtej, palta manxa ok in tak'wok ayex; ok in e sayic'ok, palta manxa ok in ilchaj e yuj.

²⁹Yujtol che buchcan el jelanilal, c'am che yochej tol ay welapnok yul e sat.

³⁰C'am che yochej che cha e yab tzet chi wala', tol che yintaknejcan el tenchebal chi wak'a'.

³¹Ok e yab yail yuj e beybal tu', toxac'al ok ex caktzaj aj yuj e yobtakil tu'.

³²A eb c'amto is nabal, ok cam eb yuj is c'am nabalil, ok lajwok ay eb yob nabal yuj c'am chi cha eb yabej.

³³A pax mac tol chi cha yab tzet chi wal xin, a jun tu' ok ayjok ec' yin junc'ulal, c'am bay ok xiwok, ẍi Cham.