Read Q'anjob'al Pr 13 Bible Online

Pr 13 - Q'anjob'al bible

Pr 13

¹A eb uninalej ay is nabal, chi cha yab eb tenchebalej chi yak' is mam; a pax mac c'am is nabal xin, tokwal chi cha yab tenchebalej.

²A mac watx' nabal, chi cha' watx'il paktzebalok yuj tzet chi yala'; a pax eb etnewom xin, a wal yaxc'ayinakil chi yochej eb.

³A mac chi taynej ba yin is k'anej, ac'al oc lanan taynen ba; a pax mac yelxac'al xiwil chi k'anjab xin, ac'al oc chi yetnej ba.

⁴A mac isaj ay tzet chi yochej, palta c'am chi makchaj yuj; a pax mac chi mulnaj xin, chi aj can bay.

⁵A mactxel watx' is nabal, c'am chi yochej etnewomal; a pax mactxel yob is nabal xin, yajbejtak c'al q'uixwiltak chi yut ba.

⁶A is tojolal junok anima, a c'am chi chaon low yin; a pax yobtakilal xin, a chi ak'on low yin eb yobtakwom.

⁷Ay mactxel tol c'am jabok tzet yetal ay bay, palta axq'uijanxac'al beyom chi yut tx'oxon el ba; ay pax mactxel caw wal ay tzet yetal ay bay xin, palta mebaxac'al chi yut pax ba.

⁸A eb beyom, chi je' manon el ba eb yul k'ab eb elk'om yuj is beyomal, a pax eb meba', tok ay bay chi elk'anelaytok eb.

⁹A eb tojol is nabal, lajan eb axca junok tzektebalej tol chi tzekeki, a pax eb yobtak is nabal xin, lajan eb axca tzektebalej toxa chi tani.

¹⁰A mactxel chi maynej ba, asan owal chi yuch ajok; axa mac chi cha yabej, chi yi' is jelanil.

¹¹A beyomal tol jun bek chi wajnaj yuj etnewomal, toxac'al chi ay tananok; a pax beyomal chi wajlay yin c'ojanc'ulal yin mulnajil, chi ajc'al can.

¹²Manxa animaok chi yuncan el mac c'amc'al chi yun is yochwan, a pax mac chi yun tzet chi yochej xin, chi ac'bi is nabal chi yabej.

¹³A mactxel c'am chi yikej junok chekbanilej, ok tit yiban; a pax mactxel ay wal yelapnok junok chekbanilej bay xin, watx' chi elocok.

¹⁴A cuybanilej chi yak' junok tol jelan is nabal, chon yitok yin k'inalej, chon ilay el yul beal camich yuj.

¹⁵A mactxel ay is nabal, chi ochelayi, palta c'am chi mayji eb etnewom.

¹⁶A mactxel tol aj nabal, chi cam yilon tzet chi yunej; axa pax mactxel tol yob is nabal xin, a tzet chi yunej a chi tx'oxon elok.

¹⁷A junok chekbej tol c'am chi yun chekbanilej yuj, asanc'al caklejbail chi yitek. A pax junok chekbej chi yun chekbanilej yuj xin, ay junc'ulalil yin.

¹⁸Asanc'al mebil c'al q'uixawc'ulalil chi tit yiban mactxel tol c'am chi cha yab watx' nabalej, a pax mactxel chi cha yab tenchebalej xin, caw wal chi ilay can.

¹⁹A yet chi junen tzet chi yochej co c'ul, caw wal chon tzaloji; palta a eb yob is nabal, c'am chi pojil ba yin yobtakilal.

²⁰Watx' tol junejc'al chach ayji yetok eb aj nabal, yet watx' che a jelanilal; tatol junejc'al chach ayji yetok eb yob is nabal xin, ok ach lajwokxac'al ay yetok eb.

²¹A eb yobtakwom, tzakanc'al oc yatakilal yintak eb; a pax eb watx' is nabal xin, ac'al watx'ilal chi cha eb.

²²A mactxel tol watx' is nabal, ay tzet yetal chi yak'can bay yitxiquin; axa is beyomal eb yobtakwom, chi cancan bay eb watx' is nabal.

²³A is tx'otx' eb meba', xiwil mi awoj chi je' yak'oni; palta toc'al ayic'ok, yujtol c'am chi mulnaj eb sat.

²⁴A mactxel c'am is camc'ulal yin yuninal, c'am chi yak' cuenta; a pax mac ay is camc'ulal yin xin, chi yak' cuenta.

²⁵A mactxel tol tojol is nabal, ayc'al is lobej; a pax mac yob is nabal xin, ayc'al wajil.