Read Q'anjob'al Pr 17 Bible Online

Pr 17 - Q'anjob'al bible

Pr 17

¹Yelxac'al watx' ta yaynakil loj chi co lo' ta ayon ec' yin junc'ulalil, yintak pax tol k'inxac'al chi co cha', cax owalc'al pax ayon.

²A junok chekbej aj nabal, ec'ban yikbej yintak junok c'ajol is patrón tol c'am wal yopiso; ay yalon yet jun chekbej tu' yin satakej yuj is patrón tu'.

³A ch'en oro yetok ch'en plata, xol k'ak'ej chi il-layi tzetbil yayji ch'en; axa pax nabalej xin, a Jehová chi beyc'ulnen elok.

⁴A mac yobtakwom, chi cha yab yobal k'anej, a mac lek'ti', chi cha yab wajoj k'anej.

⁵A mactxel chi buchon eb meba', axca wal tol lanan buchon Cham mac max watx'nen eb; a mactxel tol chi tzaloj yet lanan yaben yail junok mactxel, a jun tu' yowalil ok jay yailal yiban.

⁶A eb cham icham winak, a yitxiquin eb ayoc is maynejbailok, axca chi yun maynen ba eb uninalej yuj is mam.

⁷A mactxel tol c'am is nabal, man mojok chi yal k'anej yet jelanilal. Ilab c'apax eb yajaw, man mojok tol a lek'tial k'anej chi yal eb.

⁸A mactxel chi beybalnej yak'on tumin yin ewantakil, chi na' tol watx' chi eloc yuj, yujtol tzanc'al bay chi eq'ui, chi yunc'al is yochwan.

⁹A mactxel cac'al tu' chi eq'uel yuj bay chi etnelayi, chi yochej chi ayjic'al camc'ulal; a pax mac cac'al ti' yalubtanen junok k'anej tu', chi el eb yamigo c'atan.

¹⁰A junok belan tenchebal miman tzet chi watx'nej bay junok aj nabal, yintak pax tol chi oc junok 100 chicote yin junok yob nabal.

¹¹A junok tenomtak, asan owal chi saya', palta ok cheklaytok junok chekbej c'am yabenc'ulal yin.

¹²Yelxac'al mi watx' chi co chalej co ba yetok junok no txutx oso tol mayal ilay bey yune', yintak junok yob is nabal lanan yunen tzet yetal yin is yob nabalil tu'.

¹³A mactxel yob chi yut paktzen watx'c'ulalil, c'am bak'in ok el yailal yul yatut,

¹⁴Axca junok aej wajan chi c'oli yel yin txennej, palta c'ojanc'ulal chi jakchaj el secnaj masanil, axca tu' junok owal, txennej chi yun yel yich. Yuj tu' xan watx' tol ay mimanc'ulal yet c'amto chi el yich junok owal.

¹⁵Tatol chi ak'lay mimanc'ulal yiban mac ay mul, ma chi lowcan yiban mactxel tol c'am mul, a wal cab tu' caw wal c'am chi cha c'ul Jehová.

¹⁶¿Tzet yuj xan chi jayoc junok yob is nabal ibil oc tumin yuj chi yochej chi man jelanilal? ¿Tzet wal ok oc yuj, tol yobc'alta' is nabal?

¹⁷A junok caw wal watx' yak'on jetok, ayc'al oc jetok; a yet ay co yailal axca wal juẍtak chi yut ba.

¹⁸A mactxel c'am is nabal, chi wabaj ba yin tzanc'al mactxel, cax chi tak'wican yin.

¹⁹A mactxel tol chi cha c'ul chi tx'emwaji, caw wal chi cha' c'apax c'ul owal. A mactxel chi tx'oxxac'al el tzet ay, ac'al oc chi yitek yiban.

²⁰A junok caw wal yob is nabal, c'am bak'in ok chaloj watx'ilal yuj; a mactxel chi k'anjab yin cabsatil, a jun tu' ok ayc'ay yatakilal yiban.

²¹A is mam junok yob nabal, c'amc'al tzalojc'ulal ok yitek bay, asanc'al yatakilal ok yitek.

²²A tzalojc'ulal, lajan wal axca junok ambal; a pax cusc'ulal xin, toc'al chi yiel jip.

²³A junok yobtakwom, chi cha' ch'en montebal tumin yin ewantakil, yet watx' manak yayji chi yut beyc'ulal.

²⁴A jelanilal, a ton jun tu' uktebil oc yuj mactxel tol aj nabal, a pax mactxel tol yob is nabal xin, tok ay tzet uktebil oc yuj.

²⁵A junok uninalej tol c'am is nabal, asanc'al tx'emontek yowal c'ul is mam c'al is txutx, c'al yak'on cusc'ul eb chi yunej.

²⁶Man watx'ok tol chi k'anlay el multa yin mac c'am is mul, akxam ta wal chi jiel eb ay yopiso yuj tojol is beybal.

²⁷Aj nabal mactxel txennejc'al k'anjabi, c'al mactxel chi mitx' waay ba.

²⁸Ta c'amc'al chi k'anjab junok mactxel c'am is nabal, chi mi nalayi tol ay is nabal.