Read Q'anjob'al Pr 18 Bible Online

Pr 18 - Q'anjob'al bible

Pr 18

¹A mac yob yak'on yetok yet animail, asan yochwan chi saya', cax chi tenon ec' masanil watx' nabalej.

²A mactxel tol yob is nabal, c'am yochwan tol chi cuywi; asanc'al chi yochej chi yal yet.

³Ta a yobtakilal chi junej, chi jayoc q'uixwilal, intaknebilal, c'al buchwalil jin yuj.

⁴Ay bay is k'anej junok mactxel, lajan axca junok aej najat yich, lajan wal axca sical a' aej tol chi ajol nuk', miman jelanilal chi je' jion yin.

⁵Caw wal man watx'ok, tatol chi ok' c'ul eb cham juez yin mac tol ay is mul, cax c'am yelapnok is derecho eb c'am is mul yul sat eb.

⁶A yuj is k'anej junok c'am nabal xan chi oc owal; a yuj is k'anej tu' chi yitek yailal yiban.

⁷A yuj is k'anej junok yob nabal xan chi lowcan yin; yuj is k'anej tu' xan chi oc tx'an lasu yin is nuk' yet chi sut'lay camok.

⁸A is k'anej eb wajom k'anej, lajan axca junok tzet yetal watx'xac'al loji, tol chi tojtac'al bay yulak co c'ul.

⁹A eb isaj c'al eb chi etnentok junok tzet yetal, toxac'al chi yuẍtaknej aj ba eb.

¹⁰A Jehová, lajan wal axca junok cuartel caw wal watx' yayji bay chi apni oc eb tojol nabal yin colon ba.

¹¹A eb beyom, chi na eb tol a is beyomalil eb tu', lajan wal axca junok muralla ayoc yinlak junok conob yuj coloni.

¹²A yintak maynejbail, a tu' chi jayoc telc'obalil; axa yintak ayilal, a tu' chi jayoc ajilcanilal.

¹³Caw wal man watx'ok, cax q'uixwiltak, tatol chon tak'wi yet c'amto chi cam jaben junok k'anej.

¹⁴A junok ya'ay, chi yak' techaj ilya' yuj tec'anil yanimail; a pax mac manxa animaok ay c'ul, c'amxa chi yak' techajok.

¹⁵A mactxel tol aj nabal, chi ilchaj nabalej yuj, yujtol jakanc'al is nabal yin.

¹⁶Yuj junok sabalej, chi je' jakay puertalak, caytu' chi yun japni oc bay eb anima tol mimek yikbej.

¹⁷A mactxel babel chi yal ba, axq'uijan tol chi je' colon ba; axa yet chi apni pax oc is yajc'ul tu xin, chi txecloj elok tzet yayji ocok.

¹⁸A yet chi tx'oxon Dios is nabal yin suerteal, chi lajwi owal, cax chi pojon nan eb chi yak' owal tu'.

¹⁹Ta chi co tx'em cus junok juẍtak, yatak joc yin watx'c'ulalil yetok, yintak jak'on ayc'ay junok conob tol ay murallail, yujtol a tec'anil waay yin is nabal, lajan wal axca puertail junok cuartel watx' yoc yijul.

²⁰A tzet chi jala' chi je' yiontek yatakilal ma tzalojc'ulal jin.

²¹A k'anej, chi je' yiontek camich ma k'inalej. Yuj tu' xan watx' chi co taynej tzet chi jala', yet watx' watx' chon elocok.

²²A yet chi ilchaj yetbi nak winak, mayal wal ilchaj watx'ilal yuj xin; axca wal tol mayal cha' is watx'c'ulal Jehová.

²³A eb meba', chi tewi eb; axa eb beyom, mimektak chi yut tak'wok ba eb.

²⁴Ay mac xiwil yamigo yaloni; axa yet chi jayoc yatakilal yiban, tok chito colwaj eb; palta ay pax mac ay junok acaw yamigo yelxac'al watx' yintak yuẍtak.