Read Q'anjob'al Pr 25 Bible Online

Pr 25 - Q'anjob'al bible

Pr 25

¹Yetok c'apaxok, a ton juntzan ti' is k'anej cham Salomón, axa eb yajtz'ib cham Ezequías, reyal Judá max tz'ibencanok:

²Chi jiaj can Dios yuj tzet ewantak yayji yuj Cham, a pax eb rey xin, chi jal eb watx'il, yuj tzet chi cam yilon eb.

³Axca najatil ay satcan, c'al najatil yich tx'otx' tx'otx', caywal tu' yayji oc is nabal eb rey, c'am mac chi nachaj el yuj tzetbil yayji is nabal eb.

⁴Ta chi ilay el tz'ilal ch'en plata, chi je' watx'nelay junok tzet yetal watx' yetok ch'en.

⁵Ta chi ilay el eb yobtakwom yin yopiso bay cham rey, caywal tu' chi yun yion can yip yikbej cham yin tojolal.

⁶C'amokab cha maynej a ba satak cham rey, tamwal chach ay chotan bay chi ay chotan eb mimek winak.

⁷Yelxac'al watx', tatol chach awtelay ajtok bay tu', yintak pax tol chach ilay aytek satak eb mimek winak tu'.

⁸A tzet chela', manchak etok satak eb yajaw yin aymanil talaj ay junokxa chi apni oc yalon tzetbil yayji ocok, axa chi yunej, toxac'al chach q'uixwican ajok.

⁹A junok a caklejbail yetok mactxel cajan a cawilal, ak' ep a watx'nen ay yetok, manchak al bay junokxa.

¹⁰Axa talaj chi yun ajok, a mac chi aben tu' chi yal a k'umal, cax yobxac'al ok yun a binaji.

¹¹A junok belan k'anej watx' chi al-lay yin bayc'al ijanilal, lajan wal axca junok mansan oro ay c'apax oc plata yelbubok.

¹²Axca colk'abej c'al uej tol oro yelxac'al watx', caywal tu' is tenchebal junok jelan bay mac chi cha yab yin watx'il.

¹³A wal junok chekbej yikem, lajan wal bay is patrón axca yet chi juq'uen siquila' yet ay co takintial xol k'ak', chi sicbi c'ul cham yet chi chekoni.

¹⁴Axca takin asun, takin cak'ek', tol c'am is nabil, caytu' mactxel toxac'al chi mimanej ba yin yak'on yaloni, palta c'am pax tzet chi yak'a'.

¹⁵A k'anej yin c'ojanc'ulalil c'al yin mimanc'ulalil chi oc t'anan eb yelxac'al tenomtak yuj, toltax eb juez chi monchaj eb.

¹⁶A yet chi ilchaj no yalcab oj, manchak ec' yiban a looni; tatol miman ok a lo', ach xab talaj yuj.

¹⁷Ta chach toj ulail bay junok amigo, c'am chi je' tol coc'takxac'al chach toji, axa talaj chi yun ajok, yobxa chi yab yuj chach apnic'al ocok.

¹⁸A mac chi oc yin lek'ti' testigoal yin junok yet animail, lajan wal axca junok te', ma junok espada, ma junok julbalej tol lupupixac'al txam.

¹⁹Ta chi jaoc co nabal yin junok tol yob is nabal yet ayon oc yin yatakilal, lajan wal axca yet k'ajil co xub chon beyi, ma axca co low yetok junok je tol olanxa.

²⁰A yet ayoc co nabal yin yailal, cax chi bitnelay junok bit jabej, lajan wal axca yail yet chi alay oc vinagre yin junok yas, ma axca yilay el pichilej yet ay sic.

²¹Ta ay is wajil mac ajc'ul oc en, ak' lowok; ta ay is takintial ak' yuc'a';

²²caytu' ok yun cakbok aj sat yuj q'uixwilal, axa Jehová ok tojlanen ayach.

²³A cak'ek' chi tit bay norte chi yitek nab, caywal tu' yobal k'anej, a chi ak'on owbok yili co sat.

²⁴Yelxac'al watx' chon ayji bay junok yaliẍ lanchu, yintak pax tol a bay junok miman na yetok junok ix ix owalc'al ay.

²⁵Axca wal siquila' chi juq'uej yet ay co takintial, caywal tu' chi yun jayoc junok abix watx' chi tit bay najat.

²⁶Axca junok nuk' aej tol tat yili yuj tx'otx', caywal tu' chi yun junok mac watx' beybal chi ikbelay yun yobal yuj eb yobtakwom.

²⁷Man watx'ok tatol miman yalcab chi juq'uej; cay c'apax tu', man watx'ok tol chi jochejxac'al tol chon mimanbilnelay yuj eb jet animail.

²⁸Axca wal junok conob tol uchbilxa ay is murallail ayocok tol ay is may yayji ec'ok, axca wal tu' mactxel tol c'am chi je' mitx'on waay ba.