Read Q'anjob'al Pr 29 Bible Online

Pr 29 - Q'anjob'al bible

Pr 29

¹A mactxel pitc'al chi yut ba caxc'al xiwilxa el chi ak'lay cuenta, a jun tu', lemẍic'al ok lajwok ayok, cax c'amxa tzet watx' ok yunej.

²A yet chi oc eb watx' is nabal yin ikbej, caw wal chi tzaloj eb anima; palta a yet chi yajawbi eb yobtakwom, caw wal chi cus c'ul eb anima.

³A junok uninalej watx', caw wal chi yak' tzalojbok c'ul is mam. A mactxel chi ec' yintak eb ajmul ix, caw wal chi yak' lajwok ay is tumin.

⁴A junok rey tol watx' yin is beyc'ulal, caw wal watx' yayji is conob; a pax junok rey tol asanc'al tumin chi k'anilok, a jun tu' chi yak' lajwok ay is conob.

⁵A mactxel toc'al chi tz'ak yal watx' k'anej yin yamigo, wal yel a jun tu', lanan yaon ay yal satak.

⁶A junok yobtakwom, a is mul axca wal yal yayji oc bay; a pax junok mac caw wal watx' is nabal xin, yinc'al junc'ulal c'al tzalojc'ulal ayic'ok.

⁷A mactxel tojol, watx' chi yut watx'nen el is k'anej eb meba'; a pax junok yobtakwom xin, tok ay yelapnok eb meba' yul sat.

⁸A eb buchwajwom chi yuchaj bulnaj eb junok conob; a pax eb aj nabal xin, yojtak eb chi yak' sicbok ayok.

⁹Ta a junok aj nabal chi teyelej ba satak juez yetok junok c'am is nabal, a jun c'am is nabal tu', chi tit yowal, ma toc'al chi buchwaji, cax c'am tzet yetal chi watx'ji.

¹⁰A eb mak'om cam anima, chi yajlay eb watx' nabal yuj eb, cax chi yochej eb chi mak' camok.

¹¹A eb yob is nabal, bekanxac'al yion el eb yowal c'ul; a pax mac ay is nabal xin, chi mitx' waay ba yetok yowal c'ul.

¹²Ta a junok yajaw chi cha yab lek'tial, masanil eb ayoc yin opiso yetok, lek'tic'al el eb.

¹³A mac chi etnelayi, c'al mac chi etnewi, lajan yayji eb yin jun ti'; a yuj Jehová xan chi je' yilwan eb cawanil.

¹⁴A junok rey watx' chi yut is beyc'ulal yiban eb meba', caw wal watx'c'al yayji bay is trono yin tojbalk'inal.

¹⁵A mactxel chi yab yail, cax chi ak'lay cuenta, chi cuychaj yuj; a pax eb uninalej c'am chi ak'lay cuenta xin, chi yak' q'uixwan eb is txutx.

¹⁶A yet chi aj can eb yobtakwom, caw wal chi aj can mulej; axa eb anima watx' is nabal, ok yil wal eb yayc'ay eb yobtakwom tu'.

¹⁷Ak' cuenta oninal, yet watx' ay a junc'ulal, yuj tu' ok ach ayjok ec' yin tzalojc'ulal.

¹⁸A bay c'am chi ablay k'anjab eb chekbej Dios, chic'al yun eb anima masanil pojanil yobtakilal, palta caw wal watx' yet mac tol chi yikej ley Dios.

¹⁹A yinc'al k'anejal, c'am chi je' yak'lay cuenta junok mosejal, caxc'al chi nachaj el yuj, palta c'am chi yikej.

²⁰Watx'to wal ok eloc junok c'am is nabal, yintak pax mac comonc'al chi k'anjabi.

²¹A mactxel c'am chi tenchanej is moso yin yaliẍal, axa yin lajubal, caw wal ok yab yail yuj.

²²A mactxel ow chi yut yion aj can owal; a mactxel c'un tit yowal, ayc'al tzet yetal man watx'ok chi yunej.

²³A mactxel chi mimanej ba, chi ilay ayok; axa mactxel yaynakil chi yut ba, chi ilay aj can.

²⁴A mactxel chi junanej ba yetok eb elk'om, ac'al oc chi yitek yiban, yujtol max yak' ti' yalon el yin jichanil satak juez, palta maj yal paxok.

²⁵A mac chi xiw bay yet animail, ac'al oc chi yak' ayc'ay ba; a pax mac chi yaoc c'ul yin Jehová xin, caw wal taynebil.

²⁶Xiwil mactxel chi sayon is watx'c'ulalil eb yajaw; palta asan Jehová chi watx'nen el k'anej yin watx'il.

²⁷A eb anima watx' is nabal, c'am chi ochelay eb yobtakwom yuj eb; axa pax eb yobtakwom, c'am c'apax chi ochelay eb watx' is nabal yuj eb.