Read Q'anjob'al Pr 31 Bible Online

Pr 31 - Q'anjob'al bible

Pr 31

¹A is k'anej cham rey Lemuel miman yelapnok, tol cuybil cham yuj is txutx:

²Ach wune', a Dios max ach ak'on ayin yuj paktzilok in tewilal; tzetto wal watx' ok wal ayach.

³Manchak etnej el a ba yin eb ix ix; a yuj eb ix xan xiwil eb rey chi etax elok.

⁴Man watx'ok ach Lemuel, tol ok oc' an an caw wal ow, tamwal yuq'uen juntzan eb et yajawilal an an tu',

⁵talaj chi tojcan c'ayc'ulal ley e yuj, cax che yetnen eb anima yaynakil.

⁶Yuc'okab eb ayxa oc yin yailal an vino, yuc'okab eb yatakxac'al ay an an caw wal ow,

⁷yet watx' chi c'aytok yul c'ul eb tzet chi yut ba, c'amxa chi na eb is mebil, c'al is yailal.

⁸K'anjaban yuj eb c'am chi je' yalon ba; col eb tol c'am mac chi coloni.

⁹K'anjaban yin a watx'nen el k'anej yin tojolal; col eb ok'bal c'ul, c'al eb yaynakil, ẍi is txutx cham Lemuel tu' bay.

¹⁰A junok xal ix watx' nabal, man subojok yilchaji; ec'ban yelapnok xal yintak ch'en ch'en caw wal miman is tojol.

¹¹A xal ayoc yipok c'ul yichamil, c'am tzet chi majax bay.

¹²Xiwilxa chi yak' tzalojbok c'ul yichamil yin masanil is k'inal.

¹³Chi toj xal manoj lana c'al lino; yetok wal masanil is c'ul cax chi watx'nen is mulnajil.

¹⁴Axca junok barco chi tojtac'al bay najat, axca tu' yayji xal, chi toj yitek tzet yetal chi oc yuj.

¹⁵A yet c'amtoc'al chi sakbi, chi aj wanok cax chi c'oli yak'on low yune' c'al eb ix is chekbej.

¹⁶Chi toj yil junok tx'otx', cax chi manoni, a ch'en tumin chi yi', a ton chi yak'balnej yawon uva.

¹⁷Chi watx'nej ba, cax chi oc wal yin mulnajil.

¹⁸Tol chi cam wal yiloni, tzetbil wal chi yun bey is txon; chi mulnaj c'ualil c'al ak'balil.

¹⁹Chi watx'nej tx'al, cax chi chemwi.

²⁰Naanc'al eb meba', c'al eb ay is cawxinakil yuj.

²¹Tok chi xiw yuj is familia yet xiwil sic, yujtol masanil eb, caw wal watx' is pichil eb ayocok.

²²A chi watx'nen is txow k'ap, a wal k'ap caw wal watx' chi yaoc is pichilok.

²³A cham yichamil xal tu', caw wal ojtakbil bay despachoal is conob, ayoc tz'akilok eb mimek winak yayji bay yul is conobal tu'.

²⁴Chi watx'nej xal k'utilej, yetok c'alilej, cax chi txonon bay eb txonjom.

²⁵Caw wal tec'an waay xal, cax miman yelapnok xal yul sat anima; tok ay tzet chi na yuj cawxinakil yet yecal.

²⁶Yinc'al jelanilal chi k'anjabi, yinc'al camc'ulalil chi cuywaji.

²⁷Ayc'al oc yilon tzet chi yun beytok masanil is tzet yetal bay yatut, c'am bay tol toc'al chi ec' tiempo yuj.

²⁸A eb yune', c'al yichamil, chi yal eb watx' k'anej yin, cax chi yalon eb axca ti':

²⁹Xiwil ix watx' beybal; palta asannej ach ach ti' yelxac'al watx' a beybal yintak masanil eb ix ix tu', ẍi eb.

³⁰A wal watx'il yili mimanil junok ix, ay bay tol montebalc'al. A watx'il yili sat, jun bek chi q'uexchaji; palta a ix ix tol ay yelapnok Jehová yul sat, moj wal tol miman yelapnok.

³¹Alek watx' k'anej yin xal satak masanil conob; al-layokab watx' k'anej yin yuj masanil tzet yetal chi yunej.