Read Q'anjob'al Ec 1 Bible Online

Ec 1 - Q'anjob'al bible

Ec 1

¹A ton juntzan is k'anej cham alom el k'anej ti', a ton c'ajol David max yak' reyal bay Jerusalén. ¡Nabac'al, nabac'al! ¡Masanil tzet yetal c'am jabok yelapnok!

³¿Tzet chi yi eb anima yin xiwil mulnajil chi watx'nej eb bay yulyibank'inal ti'?

⁴Ay mac chi alji, ay c'apax mactxel chi cami, a pax tx'otx' tx'otx' xin, ayc'al ec'ok.

⁵Chi ajol c'u, cax chi tojpax can junelxa. Caytu' chi yun tojcan bayc'alta' chi eq'ui yet chi meltzoj yaj pax ul junelxa.

⁶Chi toj cak'ek' bay sur, cax chi meltzoj pax can tok bay norte. Chi ec'c'al xuyuyok cak'ek' tu', cax chi meltzoj pax yintak junelxa.

⁷A masanil a' aej, chi tojcan a' bay a' mar; palta a' mar tu', c'am yechel chi nojcan el a'. Chi meltzojpax a' aej tu' junelxa bay chi ajc'alta' ul is nuk', ac'ala' chi toj pax a' yul is be junelxa.

⁸A yuj masanil tzet yetal toxac'al chon caktzaj aj yuj, c'amxa yalbanil jantak chi yun co caktzaj ajok, c'am bak'in chi jala' tol k'okbilxa co matz'li; c'am c'apax bak'in chi jala' tol k'okbilxa jabeni.

⁹A masanil tzet yetal ay tinani', ayxac'alta' yet payxa. C'am junok tzet chi jun tinani' tol maj yun eb anima yet payxa. C'am tzet yetal tolto chi txecloj ajok.

¹⁰Ayc'alta' mactxel chi aloni: A jun ti', caw wal ac'to, ẍi mi. Palta a junok tzet yetal tu', ma txequel jayebxam abil ayxa jun tu' yet c'am onto ayon ti'.

¹¹A juntzan tzet yetal yettaxc'alta' payxa, mayal tojcan c'ayc'ulal juj. Caytu' ok yun tojcan c'ayc'ulal juntzan tzetak yetal lananto jayoc co satak yuj eb anima yet yajtok tu'.

¹²Ayin chin k'anjab ti', max in oc reyal bay in conob Israel bay Jerusalén.

¹³Max quin oc wal ijan in sayon wila', c'al in cuyon yin jelanilal masanil tzet yetal ay bay yulyibank'inal ti'. Caw wal manxa yalilok ikatz max yaoc Dios jiban ayon anima on ti'.

¹⁴Catawal tu' max nachaj el wuj tol a masanil tzet chi jun bay yulyibank'inal ti', nabac'al, c'am wal jabok yelapnok, axcaxac'al tol chi jak' jip co mitx'on cak'ek'.

¹⁵A tzet yetal tol coxanc'alta'a, c'amxa chi je' co tojlonen ocok, c'am chi je' co bison tzet yetal tol c'am.

¹⁶Catatu' chin naon yul wet axca ti': Ayin ti', caw wal mimek winak in yalon eb anima, yelxac'al jelan in yintak eb max ec'lej yin reyal bay Jerusalén ti'. Caw wal aj nabal in, xiwil c'apax tzet wojtak. Max in oc wal ijan in beyc'ulneni, tzet wal is q'uexanil jelanil yetok c'am nabalil, c'al yob nabalil, max wiltek, axca wal cak'ek' tol c'am chi je' co mitx'oni, caywal tu' juntzan tu', c'am chi je' co nabalnen elok, quin chi.

¹⁸Wal yel ta chi aj can co jelanil, chi aj c'apax can co bilc'ulal. Ta chi ajc'al can jojtaknen elok, chi aj c'apax can jaben yail.