Read Q'anjob'al Ec 5 Bible Online

Ec 5 - Q'anjob'al bible

Ec 5

¹A yet chach toj bay templo Dios, chi cam a naoni. Yelxac'al watx' tol cha jitztek a ba yet chabeni, c'al ekeni; yintak pax tol toc'al chak' a xajanbal, axca chi yun eb c'am nabal, c'am chi na eb ta yob chi yunej.

²Chi cam wal a naon yin babelal, catatu' chak'on a ti' bay Dios yin tzet chak' bay, yujtol a Dios, atac'al bay satcan ay, axa ach xin, a bay sat tx'otx' ti' ayach ec'ok. Yuj tu' xan man comonok chach k'anjabi.

³Yujtol a yin xiwil tzet yetal cha na', chach ilwaj aj yuj, c'al yuj xiwil chach k'anjabi, ayxac'al k'anej c'am yelapnok chala'.

⁴A yet chak'on a ti' yin junok tzet yetal bay Dios, manchak mayji ak'on yunej, yujtol c'am chi cha' c'ul Cham eb comonc'al chi yala', xan ak' yun bay chak' a ti'.

⁵Yel mi watx' tol c'am chak' a ti', yintak pax tol chak' a ti' cax c'am pax chak' yunej.

⁶Manchak aoc a mul yuj tzet chala', chi lajwi tu' cax chalon satak is chekbej Dios tol ayach tok yin c'ayc'ulal max aloni. ¿Tzet yuj xan cha tx'em yowal c'ul Dios yuj tzet chala', cax chi yak'on lajwok ay Cham tzet yetal max onej?

⁷Tatol toc'al cha na' tol miman tzet ok a watx'nej yin yet Dios, ma xiwil tzet chala', c'am pax chonej, nabac'al; palta watx' tol miman yelapnok Dios yul a sat.

⁸Manchak c'ayaj a c'ul tatol a bay junok nación chela', tol caw wal chi etax eb meba'; c'am chi ikelay tojolal, yujtol a eb ay yopiso, chi col-lay yuj juntzanxa eb caw wal mimek yikbej; axa juntzanxa eb tu' chi col-lay eb yuj junokxa yelxac'al miman yikbej.

⁹A ton juntzan tu' tol chi yak' eb yik yajbanilal can conob, c'al tol chi taynej cham rey eb comon anima.

¹⁰A mactxel tol ay is camc'ulal yin ch'en tumin, tol chi ajc'al can yocheni. A mactxel ay is camc'ulal yin beyomal, c'am yechel tol ok na' tol k'okbilxa tzet yetal ay bay. Nabac'al chi yetnej eb c'ul.

¹¹Yujtol ta mimanxa tzet yetal ay bay junok mactxel, miman c'apax tzet yetal chi c'aya'. Asan wal tzet yetal chi yi' yin, asan tol chi yil yec' yul k'ab.

¹²A junok mactxel tol chi mulnaji, txennej chi yun lowi ma miman chi yun lowi, palta yin wal junc'ulalil chi wayi. A pax junok beyom xin, c'am chi way yuj bilc'ulal yuj is beyomal tu'.

¹³Ay wal jun tzet yetal tol cusc'ulaltak yayji oc max wil bay yulyibank'inal ti': Tol ay mac tol toc'al chi wajbaj ec' bulan is beyomal, palta ac'al oc is beyomal tu' chi iontek cusc'ulal yiban.

¹⁴K'inalok ta a junok txon man watx'ok, chi je' lajwi ay juntzan beyomal tu' yuj. Tatol a jun ay yet tu' ay junok is c'ajol, axa yin tzunanil c'amxa tzet yetal chi je' yak'oncan bay.

¹⁵Axcac'al chi yun jalji bay yulyibank'inal ti', cac'al tu' chi yun co toj paxok. T'iran on elok chon alji, axa yet chon meltzoji c'am wal jabok co mulnajil chi jitok.

¹⁶A ton jun ti' cusc'ulaltak co naoni. Yujtol axcac'al wal max yun yalji jun beyom tu', ac'ala' caytu' yili yet ok tok paxok. Tokwal ay tzet chi yi' yin yujtol miman chi mulnaj xin.

¹⁷Ak'xa xin, xol xiwc'ulal chi lowi, yak'ban iquis ec' bay yulyibank'inal ti', xiwilxa bay chi yetnej c'ul yaben yail, c'al xiwil is bilc'ulal.

¹⁸Asan wal jun tzet yetal watx' max wil bay jun yulyibank'inal ti', asan tol chon lowi, chi juc'a', cax chi jak'on tzalojbok co c'ul yin tzet chi ji' yin co mulnajil, yak'ban ay janic'ok co cawil chi yak' Dios cayti', asan ton jun ti' chi ul junej.

¹⁹Yetok c'apax junxa ti', tatol a Dios chi ak'on mimanok co beyomal, yuj co looni c'al juq'ueni xan chi yak' ayon; a chi ak'on c'apax jak'on tzalojbok co c'ul yin co mulnajil tu'. Is watx'c'ulal Dios jun tu'.

²⁰Yak'ban a Dios chi ak'on co tzalojc'ulal yin co mulnajil tu', tok chon oc il yuj tzetbil chi yun yec'tok co k'inal.