Read Q'anjob'al Cnt 2 Bible Online

Cnt 2 - Q'anjob'al bible

Cnt 2

¹Lajan in axca junok an xumac bay jobeal yet Sarón, axca an chochol chi ch'ib bay ac'al, ẍi ix.

²A wal ix in camc'ulnebil xol eb ix ix, lajan wal axca junok an xumac xol te q'uix, ẍi nak.

³A wal nak in camc'ulnebil xol eb ach'ej, lajan wal yili nak axca junok te mansan ayaj xolak te te'. Manxa watx'ilok way chotan bay yenel, caw wal chi' sat te' chi wabej.

⁴Max in yitok bay nail miman loj, yetok wal is camc'ulalil max oc t'anan win.

⁵Ak' an c'oxox uva ayin yet chi oc wip; a wal te mansan chak' in lo', yet chi sicbi in c'ul, yujtol caw wal chin camel ach wocheni.

⁶A is q'uexan k'ab chi yaoc yalan in jolom, axa is watx' k'ab chin lak'oni, ẍi ix.

⁷Ex k'opoj aj Jerusalén, chi wak' binaj no sakchej c'al no tx'ucchej bay xolak te' yin in tewilal ayex, tol c'am che yak' yochej ajok, masantac'al a' ok ochenok, ẍi nak.

⁸¡A… lanan jayoc nak in camc'ulnebil! Chixa wab yoc yul is nuk' nak; tol wal chi aj t'uknajok chi tit bay jolomlak witz. Chi aj t'uknajok chi jayoc bay tzalanlak.

⁹A wal nak in camc'ulnebil tu', lajan wal axca tx'ucchej, axca wal junok yune' tx'ucchej. Ayxa ec' yinlak na ti', lananxa jayoc bay wentenalak, cax t'ananxac'al octek bay yulak olan.

¹⁰A nak in camc'ulnebil tu', max yal nak ayin axca ti': Ajan wan ach in camc'ulnebil, titan ach ochebil wuj.

¹¹Ilabi, mayal ec'tok c'ual sicnab.

¹²Ayxa an xumac bay xolak te', mayal apni is c'ual yet chi oc bit, chixa jab yoc nuk' no cuajte' cayti'.

¹³Ayxa sat te higo, sumumixac'al yel jabil an uva. Ajan wan xin, ach in camc'ulnebil, ach tol manxa watx'ilok eli, titan, ẍi nak ayin, ẍi ix.

¹⁴Ach in camc'ulnebil, lajan ach axca no cakmu, tol chi c'ubaj el ba bay satlak ch'en. Tx'ox a sat ayin, tx'ox yul a nuk' wabej. Caw wal watx'xac'al eli, caw wal watx'xac'al yoc yul a nuk' chi wabej.

¹⁵Uktejek no wax, yetokc'al no yune', tol chi yetnej el no' an co uva, mawal axca an lananto yak'on xumaquil, ẍi nak.

¹⁶Yet in nak in camc'ulnebil; wet c'apax nak, chi ilwi calnel nak bay xolak an xumac.

¹⁷Yak'ban c'amto chi aj wan cak'ek' yet k'inibalil, yet c'amto chi sakbi, meltzojantek ayin ach in camc'ulnebil. Lajan chot a ba axca junok tx'ucchej, axca no ach'ej tx'ucchej toxac'al chi aj t'uknaj tit bay tzalquiẍtak, ẍi ix.