Read Q'anjob'al Cnt 3 Bible Online

Cnt 3 - Q'anjob'al bible

Cnt 3

¹A bay sat in tx'at yet ak'balil, max in wayichnej in sayon ec' nak camc'ulnebil wuj. Max in sayic'ok, palta maj ilchaj wuj.

²Lajwi tu xin, max in aj wanok, max in ec' in sayon ec' bay yul conobal tu'. Chin sayon ec' jun camc'ulnebil wuj tu' bay yulak calle, c'al bay yulak txonbal. Max in sayc'al, palta maj ilchaj wuj.

³Max in k'anlen bay eb patrulla chi ec' taynen conob tu': ¿Maj mi e yil nak camc'ulnebil wuj? quin chi.

⁴Tolto wal chin el bay eb nak tu', cax max ilchaj nak camc'ulnebil wuj. Max in ocxac'al nic'an yin is k'ab, cax c'amxa chin bekilok, max wiontok bay yatut in txutx, bay cuarto in txutx bay max quin alji, ẍi ix.

⁵Ex k'opoj aj Jerusalén, chi wak' binaj no sakchej c'al no tx'ucchej bay xolak te' yin in tewilal ayex, tol c'am che yak' yochej ajok, masantac'al a' ok ochenok, ẍi nak.

⁶¿Tzet yetal jun chi tit bay tz'inan tx'otx' tu', tol xol jun toban mub chi tita, a ton xol mubal mirra c'al incienso, yetokc'al masanil makanil perfume txonbil yuj eb comerciante?

⁷A ton is batxbanil ec' cham Salomón. Oyan oc 60 soldado yin, a ton wal juntzan eb soldado yelxac'al jelan xol eb israel.

⁸Masanil juntzan eb tu', espada chi k'anbalnej eb, caw wal jelan eb yin ak'oj owal. Junjunc'al eb ayoc yespada eb yin is nan, ta c'uxan ay tzet yet ak'balil.

⁹Max watx'nej cham Salomón jun is batxbanil ec'ok, yetok te' watx'il te' ay bay Líbano.

¹⁰A yoyal ayajok, naba plata, axa k'elub yichin, oroc'al elok; axa bay chi ay chotanok, a an púrpura ayoc yin; axa bay yul tu' ayoc yelbub watx'nebil yuj eb ix ix aj Jerusalén, yuj tx'oxon eb camc'ulal.

¹¹Ex ix aj Sión, elanektok e yil cham rey Salomón, ayaj corona yuj, a ton jun max yaaj is txutx yin is jolom, t'inan chi oc yopiso yet c'ual is nupayil, a ton jun c'ual manxa tzalojc'ulalok, ẍi eb.