Read Q'anjob'al Cnt 6 Bible Online

Cnt 6 - Q'anjob'al bible

Cnt 6

¹¿Baytal max toj nak a camc'ulnebil tu' ach ix, tol watx'xac'al eli yintak eb ix ix watx' yili? ¿Baytal wal max ca toji, yet watx' chi toj co say etok? ẍi eb ix ayin.

²A nak in camc'ulnebil tu', mayal toj nak bay yawoj, bay awbil yawoj tol sumumixac'al yel jabil; max toj nak yak' tzalojbok c'ul, c'al wajon is xumac.

³Ayin ti', yet in nak in camc'ulnebil tu', cax wet c'apax nak. Chi yak' tzalojbok nak c'ul bay xol an xumac, ẍi ix.

⁴Ach in camc'ulnebil, manxa watx'ilok eli, ochbejtakxac'al eli axca wal yili conob Tirsa, c'al conob Jerusalén tol ayxa may yili, axca junok ejército chi bey yin txolilal.

⁵Manchakxac'al mutz'mon oc a sat win, yujtol mayal iji in c'ul oj. A wal xil a jolom, lajan wal axca yili yaytek bululok no chiwo bay pac'an yet Galaad.

⁶A wal e, toxac'al chi latz'atz'i, axca wal yili no calnel tolto chi eltek bay chi tx'ajlay elok, cac'onc'al bey no' yetok yune', c'am junok no' tol tx'oklil.

⁷A wal paq'uiltak a sat makan el yuj junok k'apej, axcaxac'al yili yul cabok bijan te granada.

⁸Tzalojokab cham rey yetok 60 eb xal yistzil tol reina yayji, c'al yetok 80 eb xal cab yistzil, yetok c'apax eb ix k'opoj c'amxa chi bischaji.

⁹Palta ayin ti', asan jun ix wet, axca wal cakmu c'am is tacnakil; asannej oc camc'ulnebil yuj is txutx, xan c'am junokxa lajan axca ix ti' yalon xal. A yet chi il-lay ix yuj eb k'opoj, yuj eb xal reina, c'al yuj eb xal yet is cab yistzil cham rey, masanil eb tu' chi alon yuj watx'il yili, ẍi nak.

¹⁰Mactxel jun ix chi tx'ox ba tu', axca wal tx'oxon ba yakan c'u yet k'inibalil. Watx'xac'al yili axca yet tec'an xajaw. Jopopixac'al yili axca yili yakan c'u, ayxa may yili axca ejército chi bey yin txolilal, ẍi eb.

¹¹Max in toj bay te k'akte' nogales, yuj wilon masanil tzet chi wolji bay jobe; max wochej max wila', ta lanan yelol sat an uva, c'al wilon yelol xumaquil te granado.

¹²Manxac'al naanok wuj, cochwal ayinxa ec' yul carruaje yetok in yajawil, ẍi ix.

¹³Meltzojan, meltzojan ach Sulamita. Meltzojan, chi yochej co c'ul chach jila', ẍi eb amigo. ¿Tzet yuj xan che yochej che yil in canalwi nan xol ca txol anima ti'? ẍi ix Sulamita.