Read Q'anjob'al Cnt 7 Bible Online

Cnt 7 - Q'anjob'al bible

Cnt 7

¹Manxa watx'ilok yili akan yul a xanab ach k'opoj, ach cutz'in rey. A wal a xub, caw wal watx' yili axca wal mulnajil junok jelan yin watx'nej yutxiquinej.

²A wal a c'ul, lajan wal axca junok moc tol ayc'al ay vino yul; axa a nan xin, lajan axca junok bulan ixim trigo oyanxac'al oc xumac yinlak.

³A cabil em, lajan wal axca cac'onok no tx'ucchej, tol tioẍ max yun yalji.

⁴A a nuk', lajan wal axca junok torre naba marfil; a a bak' sat, lajan axca cab a' najab bay conob Hesbón, junnej ay bay puertail yet Bat-rabim; axa a txam xin, lajan wal yetok torre bay Líbano, a ton jun acantok bay conob Damasco.

⁵A a jolom, can ayajok, axca jolom witz Carmelo; caw wal jopopi yili a xil axca an púrpura. Toxac'al chi ijican aj c'ul jun rey yuj a xil tol tzican aytek.

⁶Ach in camc'ulnebil, ach ix tol ochbejtak eli, yelxac'al watx' eli.

⁷Caw wal tojol eli axca junok an palma; axa em, lajan wal axca junjun chaan sat an palma tu'.

⁸Chin na' wajtok yin an palma tu', cax chi wion aytek an satej. A em, lajan wal axca junjun chaan an uva; a wal xob a ti', sumumixac'al axca yoc jabil te mansan.

⁹A wal a ti', lajan wal axca vino manxa watx'ilok chi wabej, ẍi nak. Chaokab nak in camc'ulnebil an vino tu' chi ec' oc yin xak ti', cax chi apni oc yinlak ye.

¹⁰Yet in wal nak in camc'ulnebil, ochebil in yuj nak.

¹¹Ton bay xolak awoj ach in camc'ulnebil, chi ec' junok ak'bal juj bay xolak an xumaquil yet alheña.

¹²Axa yet k'inibalil, chon toj bay xolak an uva, yuj jiloni, ta ayxa wol an, ta lananxa pojil xumaquil an. Ok jila', ta lananxa xumacli te granado; a wal bay tu' ok in tx'ox in camc'ulal ayach.

¹³Caw wal lananxa bey jabil an mandrágora. A bay ti' co na, ayxa sat masanil awoj watx' loji, axca sat awoj takinxa, cax tolto chi wajlayi; tx'ok wal max in pojcan el et ach in camc'ulnebil, ẍi ix.