Read Q'anjob'al Is 11 Bible Online

Is 11 - Q'anjob'al bible

Is 11

¹Axca wal yeltek wol junok te k'oj, axca tu' ok yun jay jun yinatil Isaí.

²Ok ayjok ec' Yespíritu Jehová yiban. A' ok ak'on jelanilal, c'al bak'satilal, c'al aj nabalil, c'al ipejal, c'al ojtakbilal c'al ay yelapnok Jehová yuj.

³Ok cha c'ul yiken bay Jehová. Man ok watx'nej yayji k'anej eb anima yin tzetbil yili eb, tamwal yuj tzet chi al-lay yin eb.

⁴Yin tojolal ok watx'nej el k'anej bay eb meba', c'al bay eb anima yaynakil chi yut ba. A yuj k'anej Cham xan ok yaoc yailal eb chi ec' yiban, cax ok ak'lay cam eb unem yobal.

⁵A tojolal c'al k'anej yel ok yixac'al yip yul k'ab Cham.

⁶A yet tu', a no ok c'al no calnel, c'am owal ok yun no'. A no tz'ibcoj, c'al no chiwo, junnej ok xew no'. A no ach'ej wacax, c'al no coj, lajanc'al ok yun ch'ib no' bay c'atan junjun. Axa junok unin ok ilon low no'.

⁷Ok yamigonej ba no txutx wacax yetok no txutx oso, axa yune' no', junnej ok ay cupan no' xewi. A an ac'un ok lo' no coj, axca low no wacax.

⁸A eb unin chito txutxwi ok je' sakchi yetok no txutx labaj bay ay yolanil no', ok yatok eb k'ab bay wayub no'; palta c'am tzet ok utlay eb yuj no'.

⁹C'amxa yailal bay Sión, jun tzalan tol sic'bil el yuj Jehová. Axca wal tol tz'akan chi yun nojil bay ay a' mar, caywal tu' tz'akanil ok yun yojtaknelay el Cham bay masanil yulyibank'inal.

¹⁰A yet jun tiempoal tu', ay jun rey ok tx'oxaj ba xol yinatil Isaí, axca chi yun yajol junok wolej. Ok aj jun tu' axca wal junok bandera bay xol conob. Masanil nacionlak ok wajbaj oc ba bay ayic' Cham. A bay ok ayjok ec' tu', yelxac'al mimanbil ok yunej.

¹¹A yet jun tiempoal tu', ok tx'ox Jehová is mayk'ak'al junelxa, catatu' ok wajbantek masanil eb is conob sakleminak yayjicantok. Ok tit eb ay bay Asiria bay Egipto, bay Patros, bay Etiopía, bay Elam, bay Sinar, bay Hamat c'al bay juntzan conoblak ay bay tilak a' mar.

¹²Ok aj junok bandera yuj tx'oxlayi, tol lanan wajlaytek eb Israel aytok yin mosejal bay juntzan nacionlak tu'. Lanan wajlay c'apaxtek eb anima yet Judá tol sakleminak yayji bay masanil yulyibank'inal ti'.

¹³Ok lajwok is chichonc'ulal Efraín yin Judá; c'amxa c'apax is yobc'ulalil Judá yetok Efraín.

¹⁴Ca makanil eb ok tok bay yayub c'u, yin yak'on owal yin eb filisteo, cax ok ayc'ay eb tu' yuj eb. Junnej chi yun yion ec' eb beyomal eb cajan bay yichcan. Ok apnoktac'al oc yikbej eb bay Edom, c'al bay Moab, cax ok can eb amonita yul k'ab eb.

¹⁵Ok yak' tanaj Jehová jun is k'ab a' Cakyin Mar. Ok yaontok is k'ab yiban a' Éufrates, ok tit jun owal cak'ek' yuj yiban a', xan ok tanaj a'. Ukeb makan ok yuncantok a', axa yec'tok eb yul a' yin tol manxa ok yiel eb is xanab.

¹⁶A yet ok meltzojtek eb conob Jehová bay Asiria, caw wal miman be ok chaloj yuj eb, axca wal max yun tit eb conob Israel bay Egipto.