Read Q'anjob'al Is 14 Bible Online

Is 14 - Q'anjob'al bible

Is 14

¹Ok tx'ox Jehová is camc'ulal yin eb israel junelxa, xan ok sic'lay pax el eb, yuj yoccan is conobok; yuj tu' xan ok tok cajan eb bay is tx'otx'al junelxa. A eb tx'ok conobal ok jayoc cajan xol eb yinatil Jacob tu'.

²Xiwilxa nacionlak ok colwaj yiontek eb israel; a c'apax jun eb yetok eb yet chi titcan eb israel tu' bay is conobal. Axca mosejal ok yun yoc eb yuj eb israel bay tx'otx' is tx'otx' Jehová. Ok yaoc eb israel tu' yul preso eb max aon c'apax oc eb yin presoal yet yalantok, cax ok yajawbok eb yin eb max etnen eb.

³Ex conob Israel, a yet ok ex yak'on xew Jehová yin e bilc'ulal, c'al yin e yailal bay ayex oc yin mosejal,

⁴ok e yalubtanej jun poesía ti' yin is buchbanilok reyal Babilonia: Ila wal tzet max yuncantok jun etnewom tu', ila wal max yuncantok is maynejbail.

⁵Mayal pojtok yipalil nak yobtakwom yuj Jehová, mayal k'ajtok k'okochal is yikbej,

⁶A ton jun tu' chi aon oc yailal nacionlak yetok yowal c'ul, c'amxa chi oc wanaj mak'waji. Ok'bal c'ulxac'al max yun eb conob yuj yowal c'ul jun tu'. C'amc'al chi bek yetnen eb.

⁷Masanil anima watx'xac'al yayji ec' yin junc'ulalil, caw wal chi bitni eb yuj tzalojc'ulal.

⁸Toltax te q'uisis, c'al te c'ute' bay Líbano, axq'uijanxac'al tol chi tzaloj te', yujtol max lajwi ay jun tu'. Cochwal tol chi yal te' axca ti': Yettax max ach ayc'ayi, tok ayto mac chon k'akon ajok, ẍi mi te'.

⁹A bay ayic' eb camnak, toxac'al chi bul-lajbi eb ul chaon jun rey tu'. Chi iquisbi aj pixan eb camnak tu'; a eb yajaw yet payxa bay sat tx'otx' ti', chi aj wan eb yin ul chaonok, chi aj wan eb yulak is trono is satak.

¹⁰Masanilxac'al juntzan eb tu' chi k'anjab eb bay, chi yalon eb axca ti': ¿Tom ach jun c'apax ach ach ti' tol c'amxa jabok epalil? ¿tom lajan achxac'al jetok?

¹¹A yet payxa tol chach ilay can yetok sonal te cítara. Axa tinani', ayachxa ec' co xol ayon camnak on ti'. Telan ach ay bay a wayub xol no patz, axa tzet ayaj eban, patzxac'al elok, ẍi eb camnak tu' bay.

¹²Ila wal xin, max ach titc'ay bay satcan, ach puj tol chach tzekeki yet k'inibalil. Atac'al bay sat tx'otx' ti' max ach k'oklay ayok, ach ton ti' max ak' ayc'ay juntzan nacionlak.

¹³Ach ton ti' max a na' axca ti': Ok in ajtok bay satcan. A bay tu' ok in watx'nej ay in trono bay yiban waycanlak yet Dios. A wal bay tu' ok in ay chotan bay tzalan yet wajayil bay norte.

¹⁴Atac'al yiban asun can ayajok ok in ajtok. Yelxac'al lajan ok wun yetok Cham Axac'al Ocok, cachi wali.

¹⁵Palta xin, wal yel, mayal ach aytok bay makbej camich, atac'al bay najatil yich xab olan max ach ayapnok.

¹⁶A wal eb chach iloni, toxac'al chi occan t'anan eb en, chi cam wal ach yilon oc eb, cax chi yalon eb en axca ti': Mantok tol a jun winak ti' toxac'al chi ak'on bilaj tx'otx' tx'otx', cax masanilxac'al nacionlak chi yak' lajwok.

¹⁷Tz'ininixac'al max yutcan bay yulyibank'inal, q'uisisixac'al max yut conoblak, c'amxa junok eb aj preso max beklay el yuj, ẍi mi eb camnak tu'.

¹⁸Masanilxac'al eb rey lanan xew eb, oyanxac'al oc is beyomal eb yinlak, junjunxac'al max yun tojcan eb bay is mukbanil.

¹⁹Axa ach ti', najattac'al max ach k'oklaycan el axcaxac'al k'alem tol c'amxa yopiso. A a mimanil, a tu' max k'oklaycantok xol is mimanil eb tekbilcamok, cax tec'bil aytok yul xab olan xolak ch'en.

²⁰Maj ach muklay axca max yun juntzanxa eb rey, yujtol max etnejtok a conob, yujtol max a mak'cam eb anima bay yul a conobal tu'. A yinatil jun yobtakwom ti', c'amxa bay ok ak'lay binajok.

²¹Watx'nejek bay chi mak'lay cam eb is c'ajol cham, yujc'al jantak is yobtakil max yun eb yichmam eb, yet watx' c'amxa chi yak' ayc'ay eb masanil yulyibank'inal, tamwal yak'on noj eb bay yulyibank'inal ti' yetok yinatil, ẍi jun poesía tu'.

²²A wal Jehová Cham Yajaw yin Masanil chi aloni: Ok in oc wal yin eb tinani'. A Babilonia ok wak' c'ayilok, cax c'amxa yechel ok binajok, c'amxa mac ok canok, tamwal eb yuninal, tamwal eb yitxiquin.

²³Ok wutcantok Babilonia tu' yin chic'ail, axac'al no tonton ok ayjok bay tu', q'uisisi wal ok wut wak'oncan lajwok, ẍi Cham.

²⁴A Jehová Cham Yajaw yin Masanil mayal yak' is ti', max yalon axca ti': A masanil tzet yetal tol max in na' wuneni, yowalil ok wunej.

²⁵Ok wak' lajwok el eb aj Asiria bay yul in conobal, ok wak'on ayc'ay eb bay jolomlak witz yul in makbej, cax ok wion el yailal ayoc yiban eb in conob yuj eb, cax c'amxa bay ok etax in conob yuj.

²⁶Cay wal ti' max in na' yin masanil yulyibank'inal. Watx'xa wayji yetok yipal in k'ab yuj wak'on lajwok masanil nacionlak, ẍi Jehová.

²⁷Ta axca tu' max na' Jehová Cham Yajaw yin Masanil, ¿mactowal txel ok je' tenon oc wanajok? Ta watx'xa yayji yuj Cham, c'am junokxa mactxel ok je' q'uexoni.

²⁸A wal yet jun abil yet max cam cham rey Acaz, a yet tu' max yaloncan el Isaías juntzan k'anej ti':

²⁹Manchakto ex tzalojbi ex filisteo yuj mayal k'ajtok te c'ax max aon oc yailal e yiban. A yin yinatil junok no comon labaj, a yin tu' ok pitzc'oj aj junok no bakne, a ton no' caw wal ow, jun bek chi toj jululok.

³⁰A eb yaynakil xol conob Israel caw wal ok ilchaj is lobej eb; axa eb ay is majilal, ok way eb yin tzalojc'ulal. Axa e yiban ayex filisteo ex ti', ok yatok Jehová wajil e xol, xan a jaywanokxa ex chex can tu', wajil ok on e cami.

³¹C'uyuyanek ex conob filisteo, elokab e yaw yuj yail; bilanek aj yuj xiwc'ulal, yujtol a bay norte chi tit jun bulan ejército. Lajanxac'al tit axca mub. C'am junok soldado chi elcan xol eb.

³²¿Tzet ok yun co tak'wi bay eb chekbiltek ayon yuj nacionlak? Alek bay eb tol a Jehová max ak'on tec'anilal bay conob Sión; a eb ayoc yin bilc'ulal xol is conob Cham chi toj eb col ba bay tu'.