Read Q'anjob'al Is 16 Bible Online

Is 16 - Q'anjob'al bible

Is 16

¹Ex aj Sela bay tz'inan tx'otx', aektek no e calnel bay yajaw conob bay tzalan Sión.

²A eb cajyom bay Moab, bay chon ec'tok bay Arnón, lajanxac'al ok yun eb axca no tz'iquin xiwnakxac'al yet chi elaj bay is wayub.

³Ok yalon eb bay eb aj Sión axca ti': Naek wali, tzet ok yun e colwaj jetok. Colwajanek jetok xin, axca yenel junok te' yet chuman c'u; axa yenel tu' k'ekk'olinakokab yili, axca yet ak'balil. C'ubajek on el ayon lanan jelaj ti', manchak on e tx'oxo'.

⁴Chaek on apnok cajan e xol, c'ubajek on el bay eb lanan jayoc jin on, ẍi eb aj Moab tu'. A yet ok lajwok ec' yailal tu', a yet ok el jun chi ak'on lajwok ay nación ti',

⁵axa jun yinatil David ok oc yin reyalil, ok yak' yajawilal xol anima yetok camc'ulal, c'al yin bayc'al ijanilal. Ayman ok watx'nej tojolal, cax ok yiloni tol tojolc'al ok yun eb juez.

⁶Jojtak wali, tzetbil yayji oc is maynejbail eb aj Moab, ch'aan eb, ayxa may k'anjab eb, palta c'am yelapnok tzet chi yal eb tu'.

⁷Yuj wal tu' xan a masanil eb cajyom bay Moab, ok ok' eb yuj is nación. Masanilxac'al eb ok oc yin cusc'ulal yuj loj manxa watx'ilok chi tit yet yalantok bay Kir-hareset, cax toxac'al ok taccan aj c'ul eb yuj.

⁸A masanil an uva bay Hesbón, yetokc'al bay Sibma ok etaxtok, masanil juntzan mimek winak bay nacionlak chi telc'ojtok eb yuj vinoal an uva tu'. A is k'ablak an, chi apnitac'al oc bay Jaser, cax chi tojtac'al bay tz'inan tx'otx', chi apnitac'al oc bay ti a' mar.

⁹Yuj tu' xan chin ok' yuj an uva ay bay Sibma, ac'ala' c'apax yuj an bay Jazer, cax chi el c'apaxtek yal in sat yuj an bay Hesbón, c'al bay Eleale. A bay xol yawoj eb tu', a wal tu' ok el aw yet owal.

¹⁰A bay chi oc mulnajil, c'amxa aw yet tzalojc'ulal ok ujok, c'amxa mac ok awjok yuj tzalojc'ulal, c'amxa mac ok bitnok xol an uva, tok ayto mactxel ok tec'wok el yal an. Ok yak' lajwok Jehová masanil aw chi uji.

¹¹Caw wal cusiltakxac'al in c'ul yuj Moab, c'al yuj Kir-hareset, axca cusiltakil yoc nuk' te arpa.

¹²Caxc'al mi chi toj eb aj Moab tu' bay jolomlak witz, cax chi oc eb yin tewilal bay tu', masantac'al chi yal c'unbi eb, caxc'al mi chi toj eb bay is templo txajlok, palta c'amxa tzet yetal ok yi' eb yin.

¹³A ton wal juntzan k'anej ti' max yalcan el Jehová yin Moab yet yalantok.

¹⁴Axa tinani' xin, chi yal Cham axca ti': Yet wal oxeb abil tinani', axca wal chi yun bison junok mulnajwom is tiempo, axca wal tu' ok yun lajwok is beyomal Moab; axa eb aj Moab tu' tol xiwil, ok intaknelay elok. Yet jun tiempoal tu', junxanej yal botzan anima ok canok, cax caw c'amxa yip eb, ẍi Jehová.