Read Q'anjob'al Is 18 Bible Online

Is 18 - Q'anjob'al bible

Is 18

¹Ok'bal c'ul jun nación bay caw wal chi bil xic' no coc'tak no', a ton jun nación ay bay tilak a' mimek aej yet Etiopía.

²Chi yatok eb is chekbej ay mimek yikbej bay yiban a' Nilo, chi toj eb yiban a' yetok juntzan axca aj c'albil topayok. Ex chekbej, meltzojanek yin aymanil bay eb e yet conob tol mimek is tel, tol c'am xil is mimanil eb, tol ay is may binaj eb bay masanil conob. Caw wal tec'an eb, chi ayc'ay nacionlak yuj eb, cax cajan eb bay jun tx'otx' tol pojquiltak yuj mimek aej.

³E masanil ayex cajan ex bay yulyibank'inal ti', ok e yila' yet ok ilay aj bandera bay jolomlak witz, ok e yab yet ok xulay trompeta.

⁴Max yal Jehová ayin axca ti': Atac'al bay in lugar, watx' wilontek eb, palta tz'inc'al quin chi, axca yowal yakan c'u yet waresma, axca yal ak'bal chi ay yet elnak wal wajoj sat awoj.

⁵A ton yet mayal lajwi ec' xumaquil an uva, cax chi txecloj can aj sat, axa yet c'amto chi jay c'ual wajlay sat an, a eb ajc'ul ok ak'on lajwok el eb soldado yet Etiopía. Subojxac'al ok yun lajwi ay eb axca chi yun c'uplay el k'ablak an uva, ma axca chi yun yilay el coc'lak k'ab an.

⁶A masanil is mimanil eb tu' ok cancan bay jolomlak witz, bay ay no ostoc yetokc'al no chiwajwom no'. A yet c'atxan ok jay no ostoc yin, axa yet sicnabil ok jay no chiwajwom no' yin, ẍi Jehová.

⁷A yet tu', ok ilaytek ofrenda bay Jehová Cham Yajaw yin Masanil, yuj jun conobal anima mimek is tel, tol c'am xil is mimanil eb, a ton jun nación ay is may binaj bay masanil conob, caw wal tec'an eb, tol chi ayc'ay nacionlak yuj, cajan bay jun tx'otx' tol pojquiltak yuj mimek aej. A yofrenda eb tu', ok yitek eb bay tzalan Sión, bay chi oc ayilal bay Jehová Cham Yajaw yin Masanil.