Read Q'anjob'al Is 21 Bible Online

Is 21 - Q'anjob'al bible

Is 21

¹Juntzan k'anej max al-laycan el yin tz'inan tx'otx' bay ti a' mar. Axca wal junok owal cak'ek' chi ec' bay tx'otx' Néguev, caytu' ok yun tit c'aybanilal bay tz'inan tx'otx' bay ay is may.

²Ayxa is may jun tzet yetal max tx'ox Dios wil ti': A mactxel yob is nabal yin yet animail, yobc'alta' chi yunej. A mactxel c'aywajwom, ayc'alta' tzet chi yak' lajwok. Asek yin owal ex soldado aj Elam. Ex aj Media, ocanek oyan yin conob Babilonia. A Jehová ok ak'on lajwok yailal max yaoc jun conob tu'.

³Caw ya' in mimanil chi wabej, toxac'al chin ec' tx'umumok yuj yail axca chi yun ix ix chi watx'ji c'ul yuj unin. Chin oc yin bilc'ulal yuj tzet chi wabej, chin xiwaj yuj tzet chi wila'.

⁴Sombinakxac'al ay in nabal, caw wal yobxac'al in c'ul chi wab yuj ay is may. Caw wal watx' chi wab yet junjun yayc'ualil; axa tinani', mayal yutcan aj ba yin xiwc'ulalil ayin.

⁵Max watx'nej ay eb meẍa, c'al yaon ay eb wixlubej; lanan low eb c'al yuq'uen a' eb, cax chi oc jun aw axca ti': Ajanek wan ex yajawil soldado, watx'nejek e ba yetok e makbal julbalej, ẍi max wabej.

⁶Yujtol a Jehová max alon ayin axca ti': Ocokab junok makwajwom, yet watx' chi yal masanil tzet chi yila'.

⁷Tatol ok yil tit carruaje tok'bil yuj cac'onok chej, ma anima ayoc yiban no burro, ma yiban no camello, chi cam wal yiloni, tzetbil yili, ẍi Cham.

⁸A jun makwajwom tu' max el yaw max yaloni: A bay chin makwaj ti' Mamin, ayinc'al ec' junjun c'u, c'al junjun ak'bal yin in makwaji.

⁹Axa tinani', chi wil tit jun carruaje tok'bil yuj cac'on chej, ẍi jun makwajwom tu'. Ay jun mactxel chi aloni: Mayal ayc'ay Babilonia, mayal ayc'ayi. Masanil is diosal eb mayal pojtok, wekanxac'al tok sat tx'otx' ẍi, ẍi nak makwajwom tu'.

¹⁰Abek ex wet conob, tol max ex tec'lay wal ay yuj eb aj Babilonia, axca chi yun tec'lay ixim trigo. Lanan walon ayex tzet yetal max wabej, tzet max yal Jehová, Cham Yajaw yin Masanil, a ton co Diosal ayon Israel on ti'.

¹¹A k'anej ti' max al-laycan el yin conob Edom: Ay jun mactxel max awjitektac'al ayin bay Seir: ¿Jantakto sakbi tinani', ach makwajwom, jantakto sakbi? ẍi.

¹²Max in tak'wi axca ti': Toxa chi sakbi, palta ok jay pax ak'balil junelxa. Ta chochej cha k'anlej junelxa, meltzojan ul a k'anlej, quin chi bay.

¹³A juntzan k'anej ti' max al-laycan el yin Arabia: Ex txonjom aj Dedán, tol chi ec' ak'bal e yuj bay xolak te' bay Arabia,

¹⁴elanektok e chaon jun mac ay is takintial, cax che yak'on aej yuq'uej. A ayex cajan ex bay conob Tema, elanektok bay chi ec'tok eb chi toj elajok, cax che yalten loj bay eb.

¹⁵Yujtol lanan yelaj eb bay ch'en espada, a ton bay ch'en espada caw wal el ye, bay julbalej tol watx'xa yayji yet chi jul-lay elok, a ton bay ow wal yak'on owal.

¹⁶A Jehová max alon ayin axca ti': A wal yet jun abil tinani', axca chi yun bison junok mulnajwom is tiempo, mayal xam lajwi masanil is mimanbilal conob Cedar.

¹⁷Jaywanxanej eb julwajwom, a ton eb ak'om owal bay Cedar tu' ok canok. Cay wal tu' chi yun walon ayin Jehová e Diosal in, ayex israel ex ti', ẍi Cham.